A GUARDA

O concello de A Guarda logra un millón de euros de financiamento para turismo, do Plan de Recuperación  

• O Goberno central aprobou o financiamento do Plan de Sostibilidade Turística en Destino (PSTD) presentado polo concello guardés 

• Este plan será financiado con fondos Next GenerationEU en materia de sostibilidade turística, en liña co plan de Recuperación Transformación e Resiliencia. 

 

Paseo da rúa do Porto, na vila de A Guarda

Fotos: Infogauda

Infogauda / A Guarda 

 O Goberno central aprobou o financiamento do Plan de Sostibilidade Turística en Destino (PSTD) presentado polo concello de A Guarda. Dese xeito, o concello guardés consegue un millón de euros de financiamento para turismo do Plan de Recuperación.  

 En Galicia foron aprobados 16 proxectos de sostibilidade turística entre os cales se atopan o “PSTD A Guarda” cun orzamento de 1.000.000 de euros e o proxecto “Despensa de Galicia”, financiado con 1.500.000 de euros, presentado polo Xeodestino Ría de Vigo e Baixo Miño, unha agrupación de 14 concellos entre os que tamén se atopa A Guarda. 

 “O principal obxectivo que se tivo en conta para elaborar o “PSTD A Guarda”  foi o de consolidar o turismo mediante unha serie de accións que reforcen a sostibilidade do destino apoiándose nos seus recursos fundamentais: a gastronomía, o patrimonio cultural e o patrimonio natural, que o converten nun destino único onde o mar, río e patrimonio material e inmaterial xeran unha paisaxe singular e crean sinerxías coas actividades do sector privado, ao que se lle atribuirá unha maior gobernanza”, indican desde o Goberno municipal que preside o alcalde Antonio Lomba Baz.

 “Foron moitos os axentes locais que participaron na elaboración e apoio do “PSTD A Guarda”. O concello agradece a todos os particulares, empresas e entidades que, ben a través de reunións sectoriais, cartas de apoio ou enquisas se implicaron neste proxecto turístico. Estas achegas foron fundamentais para conseguir o financiamento”, afirma o alcalde Antonio Lomba.

O Plan de Sostibilidade Turística en Destino (PSTD) inclúe un novo proxecto artístico para o contradique de Punta Xenete coa incorporación de iluminación artística

 O plan inclúe, entre outras actuacións: a protección e rexeneración do ecosistema dunar da praia do Forte (Camposancos); actuacións relacionadas coa mellora da xestión do uso do Monte Santa Trega, implantando medidas que regulen o acceso a este espazo de alta presión de visitantes coa creación dun estacionamento disuasorio na zona da Porta do Trega. Un novo proxecto artístico para o contradique de Punta Xenete coa incorporación de iluminación artística. A mellora do tramo de senda da estrada de Camposancos, entre o cruce co paseo de Portugal e a entrada do barrio do Couto. O impulso á náutica deportiva e tradicional coa instalación de pantaláns flotantes nos portos de A Guarda e da Pasaxe. A posta en valor de A Guarda como destino gastronómico; a creación de contidos dixitais e a dixitalización da comercialización dos servizos turísticos municipais. 

 Este ambicioso Proxecto Sostible de Turismo en Destino desenvolverase en tres anualidades entre o 2023-25 e dará resposta a necesidades e demandas que tan unha vila turística como A Guarda na que é necesario potenciar a gobernanza e modernización do sector.