A CIG chama a mobilizarse mañá martes, día 29 de novembro, contra a crise e a pobreza
• A central sindical demanda políticas públicas, salarios e pensións dignas
Infogauda / Compostela
A grave carestía da vida, xa presente desde antes da guerra mais agravada desde o seu inicio, está acelerando o aumento das desigualdades e da pobreza. Por iso a CIG convoca mobilizacións este martes, día 29 de novembro, en cidades e vilas, en demanda de políticas públicas, salarios e pensións dignas.
Mobilizacións (O secretario xeral, Paulo Carril, asistirá á convocada na Coruña)
- Vigo: A Dobrada, 19h
- A Coruña: Praza de Vigo, 19.30h
- Pontevedra: Praza da Peregrina, 20h
- Ferrol: Local da CIG (Avda. de Esteiro), 19:30h
- Compostela: Praza Roxa, 19:30h
- Ourense: Praza Maior, 19:30h
- Lugo: Edificio Sindical (Ronda da Muralla), 20h
- Vilagarcía: Casa do Mar, 20h
- As Pontes: Praza do Hospital, 19:30h
- Burela: Praza da Mariña, 19h
- Verín: Praza do Concello, 19h
- O Barco: Praza do Concello, 19h
- A Guarda: Praza Avelino Vicente, 19h
- A Estrada: Praza do Mercado, 20h
A CIG alerta de que coa inflación descontrolada, os prezos da electricidade e dos combustíbeis que non baixan e os produtos de primeira necesidade subindo a prezos desorbitados, a situación económica e social é cada vez máis extrema e está a ter un impacto brutal, nunha Galiza con importantes sectores produtivos e comarcas enteiras agonizando, con cada vez menos emprego e industria, con máis emigración e con máis poboación avellentada.
A central sindical denuncia as insuficientes medidas do chamado Plan de Resposta Económica á Guerra e as nefastas actuacións do Goberno galego. A isto engade a aprobación dun duro paquete de reformas para satisfacer as inxustas exixencias da UE e acceder a uns envelenados fondos europeos que están a hipotecar o noso futuro.
Orzamentos inxustos
Considera que os orzamentos do Goberno galego e os do Goberno español son unha suma de medidas inxustas, tanto pola discriminación do destinado a Galiza, como porque non dan solución ás graves carencias e necesidades sociais. Orzamentos que veñen acompañados, ademais, de lesivas reformas na Seguridade Social, que se suman á última reforma laboral, na que nin recuperamos nin gañamos dereitos, mentres avanza, baixo novas formas, a precariedade laboral.
Fronte a isto denuncia o incremento de orzamentos destinados a armamento; as medidas para impoñer o Pacto de Rendas e o nefasto diálogo social, con subas salariais que non garanten poder adquisitivo dos salarios, mentres o SMI e as pensións seguen por baixo do que recomenda a Carta Social Europea.
Un panorama fronte ao que a central sindical entende que estamos chamados e chamadas ao conflito ante a patronal, na negociación colectiva, e ante os Gobernos galego e central, para que se aproben medidas de intervención pública na economía e nos sectores estratéxicos (financeiro, enerxético etc.). Un verdadeiro Plan de Choque urxente para frear os efectos devastadores dos altos prezos e para afrontar unha saída galega xusta da crise.
Por iso chama á sumarse á mobilización convocada para mañá martes, día 29 de novembro, para facer fronte a esta situación, porque está en risco que a clase traballadora galega sexamos quen paguemos, máis unha vez, esta nova crise, como pasou coas crises anteriores.
Ningún comentario:
Publicar un comentario