Concello e Agrupación Musical traballan para converter O Rosal nun referente
Ao abeiro do programa ‘A veciñanza conta’, alcaldesa e agrupación analizaron o traballo realizado durante a pandemia e as iniciativas pioneiras postas en marcha
Infogauda / O Rosal
O
Concello prosegue a rolda de contactos co tecido asociativo ao abeiro do
programa ‘A veciñanza conta’ para construír O Rosal do futuro. A alcaldesa,
Ánxela Fernández Callís, acompañada dos concelleiros de Cultura e de
Participación Veciñal, Carlos Villanueva e Ramón Fernández Leal, mantiveron un
encontro coa directiva da Agrupación Musical do Rosal no que analizaron os dous
últimos anos de actividade, coa crise sanitaria en pleno auxe.
“O
balance non pode ser máis positivo. Durante a pandemia Agrupación e Concello
traballamos man a man non só para que a Escola de Música continuara coa súa
actividade ou levar a cultura aos barrios, senón que fomos quen de adaptarnos
ás circunstancias e mesmo xerar novas iniciativas”, lembra a rexedora. Neste
camiño, o Concello reconverteu a planta baixa do auditorio municipal nun
escenario de máis de 12 metros cadrados para que a Agrupación Musical puidera
continuar coa súa actividade priorizando a saúde.
Outro
exemplo de adaptación e superación é a creación de novos formatos como o
festival O Rosal Cámara Fest, un novo xeito de entender a música e dos espazos
nos que se desfruta “que queremos que se converta nun festival referente a
nivel musical que poña en valor a calidade da nosa música”. E só é un primeiro
paso. “Queremos que O Rosal sexa un lugar ao que a veciñanza e a xente de fóra
se achegue para gozar de música de calidade que temos no noso municipio en
espazos innovadores”, recalca Fernández Callís.
Concello
e Agrupación Musical do Rosal abordaron tamén nesta reunión o camiño para
continuar medrando e que, nun futuro próximo, a agrupación poida participar en
certames de entidade internacional. A rexedora quixo dar os parabéns a
Agrupación por todo o traballo desenvolvido, a súa capacidade de resiliencia, o
éxito das actividades que están a desenvolver e a calidade formativa e musical
que está a xerar a través da Escola de Música.
Por
outra banda, a Agrupación Musical do Rosal tamén amosou a súa disposición a
participar en vindeiras datas no proceso participativo que o Concello porá en
marcha ao abeiro da Axenda 2030, coa que se abordarán os retos sociais,
ambientais, económicos, culturais ou educativos para un desenvolvemento urbano
sostible.
Ningún comentario:
Publicar un comentario