DEPORTES

BALONMÁN

DHF

O Atlético Guardés ficha mocidade, dinamismo e gol con  Pauli Fernández 

O club miñoto incorpora a unha das mellores xogadoras da División de Honra Prata 

A central internacional paraguaia chega desde o Unión Financiera Base Oviedo tras terminar como máxima goleadora da competición con 203 goles 

Pauli: “É un soño xogar na liga Guerreiras e máis neste equipo” 

Abel González: “É unha xogadora todoterreo”

Jesús López González, presidente do Atlético Guardés, con María Paula Fernández

Foto: M.A.G.

Redacción / A Guarda 

 Tras sumar ao seu proxecto a experiencia e o percorrido de Cristina Cifuentes e Giselle  Menéndez, o  Mecalia Atlético Guardés aposta pola mocidade para seguir configurando o seu persoal do próximo curso. A moza María Paula Fernández incorpórase ao proxecto  miñoto desde a División de Honra Prata, onde destacou de forma sobresaliente na tempada recentemente finalizada. A nova xogadora do equipo miñoto anotou co Base Oviedo a friorenta de 203 tantos para proclamarse máxima goleadora da competición, tanto do seu grupo como dos outros tres.  

 Pauli é unha das indiscutibles da selección de Paraguai e en agosto cumprirá 24 anos. A xogadora guaraní ten experiencia en División de Honra, xa que chegou a España da man do equipo La Calzada xixonés en 2016. Nos últimos anos, creceu  exponencialmente no Unión Financiera Base Oviedo. Esta tempada foi a mellor xogadora do equipo e, probablemente, tamén do seu grupo ligueiro, con esa tremenda cifra de 203 dianas. É unha central eléctrica,  rapidísima, cunha facilidade innata para penetrar directa a portería e, por suposto, marcar. E se as xogadas non acaban en gol, adoitan facelo en lanzamentos de sete metros e exclusións.  

“Espero poder achegar ao equipo todo o balonmán que teño e seguir aprendendo de todas as xogadoras e do técnico”  

Pauli Fernández 

 “Estou moi contenta de empezar esta aventura co Guardés”, expresa Fernández, que cataloga como “un soño” poder xogar na liga Guerreiras Iberdrola. “E máis neste equipo”, asegura. “Quero agradecer a oportunidade de fichar polo Guardés. Espero poder achegar ao equipo todo o balonmán que teño e seguir aprendendo de todas as xogadoras e do técnico”, engade.  

 Abel González define á paraguaia como “unha todoterreo”. “Adáptase moi ben a calquera posto da primeira liña. Tácticamente é intelixente e é unha xogadora que, pola súa estatura, ás veces é complicada de defender, porque é pequeniña, ao estilo María  Sancha”, explica o técnico asturiano, que observa que Pauli pode xogar “mesmo nos extremos” nun momento dado. “A nivel defensivo, é moi intelixente. Pode facer un avanzado nun 5.1 ou defender no exterior, pero tamén nos vai a axudar moito”, sostén González.