OIA

ACIGAL retoma a súa actividade tras a pandemia, co obxectivo de promover o patrimonio galego  

A  VIII Asemblea Xeral celebrouse no Mosteiro de Santa María de Oia

Un momento da VIII Asemblea Xeral da Asociación de Mosteiros do Císter de Galicia, celebrada no Mosteiro de Santa María de Oia

Foto: R.M.O.

Redacción / Oia

 A Asociación de Mosteiros do Císter de Galicia celebrou o pasado luns 23, no Mosteiro de Santa María de Oia, a súa VIII Asemblea Xeral para acordar con todos os seus socios a súa volta á actividade.   

 Fundada en 2014 polos representantes dos mosteiros de Aciveiro, A Franqueira, Meira, Montederramo, Oia e Xunqueira de Espadanedo, aos que se uniron máis tarde Melón e Monfero, ten por obxectivo promover, difundir, fomentar, protexer e soster o patrimonio cultural  cisterciense galego e a súa contorna, que compón o Itinerario Cultural das Abadías Cistercienses, aprobado oficialmente polo Consello de Europa o 7 de xuño de 2010.    

 Tras a edición da guía do Roteiro do Císter galega, continuarán traballando para promover este importante patrimonio cultural nun ámbito rexional e nacional, pero sobre todo europeo.  

 Ademais da renovación da xunta directiva, cuxa presidencia recaeu en Xoán Martínez, director do Real Mosteiro de Oia, acordouse e renovouse o compromiso de actuar como bloque nas accións derivadas da participación activa de varios mosteiros galegos, na Carta Europea da Abadías  Cistercienses e nos proxectos transnacionais en curso que potencian a promoción e difusión do noso patrimonio.  

 Á Asemblea Xeral asistiron os socios: 

Meira: Yoani Jartín, técnico de Turismo do  Concello de Meira; Agustín Méndez, concelleiro de Cultura; e Miguel Asorey, párroco de Meira. 

Montederramo: Antonio Rodríguez, alcalde, e Elvira, por parte do Concello. 

Xunqueira de Espadanedo: Carlos Gómez, alcalde. 

 E por parte de Oia estivo como convidada a alcaldesa Cristina Correa.