OIA

O Concello de Oia organiza un concurso escolar de debuxo con motivo das Letras Galegas    

 

Infogauda / Oia

 O Concello de Oia organiza un concurso escolar de debuxo con motivo do Día das Letras Galegas, o cal premiará os mellores retratos do escritor homenaxeado este año, Florencio Delgado Gurriarán. Poderá participar no certame o alumnado dos colexios CEIP Mestre Manuel García e CEIP Refoxos.  

 Cada estudante poderá presentar ao concurso un só traballo, que consistirá nun retrato do homenaxeado realizado en folio ou cartolina en tamaño A4. Deberá ser obra orixinal e inédita, e a técnica artística a empregar será libre (acuarela, lapis de cores, rotuladores, ceras, brillantina, adhesivos, etc.)  

 Os traballos deberán entregarse nos centros educativos e cada participante indicará no reverso do folio que conteña o debuxo o seu nome, apelidos e curso escolar. O prazo de presentación remata o próximo día 16 (incluído).  

 Cada colexio elixirá o seu xurado e seleccionará os mellores debuxos en cada unha das tres categorías previstas: 1) Infantil, 2) a correspondente a 1º, 2º e 3º de Primaria e 3) a correspondente a 4º, 5º e 6º de Primaria.  

 En total, repartiranse tres premios en cada colexio, un por cada categoría. O galardón consistirá nun diploma e máis un lote de libros.