GALICIA

As praias de Area Grande e O Forte, voltarán a contar con bandeiras azuis

Galicia terá este verán 112 praias con bandeira azul, tres das cales conseguen o galardón por primeira vez  

A Comunidade consolida a súa posición a nivel nacional, cun total de 166 distintivos azuis concedidos entre praias, portos, centros e sendeiros 

Praias de Camposancos ( A Guarda)

Fotos: Infogauda

Praia Area Grande (A Guarda)

Infogauda / Galicia

 Un total de 112 praias galegas pertencentes a 34 municipios terán este verán unha bandeira azul, distintivo co que cada ano a Asociación de educación ambiental e do consumidor (Adeac) recoñece a areais de todo o mundo en base a criterios de sustentabilidade e de servizos. 

 De todas as praias galardoadas nesta última edición cómpre subliñar que tres lucirán a bandeira por primeira vez: Porto Suevos, no concello de Arteixo; Banda do Río, en Bueu; e Santa Baia, en Vigo. Ademais, a de Fontela Valea, en Barreiros, volve sumarse á listaxe de areais galegos con esta distinción, despois de que o ano pasado non a recibira. 

 Galicia concentra unha de cada cinco das bandeiras concedidas en 2022 en todo o país, con 112 areais recoñecidos que se estenden ao longo de 42,7 km. Deste xeito, consolida a súa posición entre as comunidades españolas que reciben cada ano un maior número de distintivos azuis para as súas praias, xunto á Comunidade Valenciana e Andalucía. 

 Ademais, 11 portos deportivos galegos tamén lucirán unha bandeira azul este verán; 14 instalacións dedicadas á educación ambiental e á atención aos visitantes terán a consideración de centros azuis; e 29 rutas converteranse en sendeiros azuis. 

 Este balance, cun total de 166 distintivos concedidos a Galicia entre praias, instalacións portuarias, centros e sendeiros, supón un aumento de 11 respecto aos datos do ano pasado, cando a cifra de areais galegos con bandeira azul foi de 111 —1 menos que en 2022—. De igual xeito, a Comunidade tamén suma un novo centro azul, ao incorporarse por primeira vez o centro de visitantes do Faro de Cabo Vilán, en Camariñas, e engade 9 sendeiros azuis á vintena do pasado ano, mentres que o número de portos que lucirá este emblema se mantén sen cambios respecto a 2021. 

 Así mesmo e por primeira vez, Adeac concedeu en España 9 mencións especiais a municipios con bandeira azul que teñen demostrado un esforzo notable por avanzar nalgunha destas tres áreas: educación ambiental, socorrismo e praias inclusivas. Precisamente, cómpre subliñar que unha destas mencións recaeu no concello lucense de Burela, en recoñecemento ao labor que desenvolve no eido da educación ambiental.

Municipios con máis galardóns e datos por provincias

 Nesta edición de bandeiras azuis, Sanxenxo volve repetir como o municipio de toda España con máis areais galardoados, un total de 17, a mesma cifra que o ano pasado. En todo caso, cómpre subliñar que este concello suma ademais outras tres distincións para os seus portos deportivos e terá de novo un centro azul. En Pontevedra destacan tamén Vigo, que suma 11 areais —1 máis que en 2021 grazas á incorporación de Santa Baia—; Baiona, con 6 praias e 1 porto galardoados; Cangas, 5 praias e 1 porto; Marín, 5 praias e 2 centros azuis; e Bueu, tamén con 5 areais e 2 centros azuis. 

 Así mesmo, no caso da provincia coruñesa o municipio de Arteixo volve ser o que concentra máis bandeiras azuis, un total de 8; seguido da cidade da Coruña —5 areais e 1 porto— e de Oleiros —que este ano terá 5 praias con bandeira e 2 centros azuis—. 

 Por último, Foz volve ser o concello lucense con máis areais galardoados, un total de 5; mentres que Barreiros, con 3, recupera a bandeira azul para o de Fontela Valea; e Burela consigue o recoñecemento de Adeac para 3 das súas praias e 2 centros azuis.

Criterios de excelencia

 Os criterios esixidos para a obtención de bandeiras azuis en praias e portos deportivos están relacionados coa calidade das augas —que ten que ser excelente—; a seguridade e a accesibilidade; a dotación de servizos; así como a xestión ambiental e a sustentabilidade destes espazos. Pola súa parte, os centros azuis deben fomentar a educación ambiental no litoral, o coñecemento da contorna e as alternativas de ocio.

 Un ano máis, España é o país que concentra o maior número de bandeiras azuis de todo o mundo. En concreto, recibirá 729 galardóns, dos cales 621 ondearán en praias de distintos puntos do país, 103 irán a parar a portos deportivos e 5 a embarcacións turísticas. Así mesmo, tamén contará con 79 centros azuis. 

 Neste sentido, a Xunta felicita a todos os municipios galardoados polo esforzo realizado para presentar as mellores e máis completas candidaturas e lograr un recoñecemento consolidado xa a nivel internacional como símbolo da calidade e excelencia das praias, portos, sendeiros e centros da natureza que hai en Galicia.  

 Por último e con relación aos sendeiros azuis, cómpre precisar que este ano Adeac decidiu convocar estes distintivos como un programa independente. O acto de entrega deste galardón aos 86 roteiros galardoados en España —29 deles en Galicia, que volve ser a Comunidade con máis sendeiros azuis— realizarase o 26 de maio en Madrid. 

 A continuación detállanse os galardóns concedidos en 2022 en Galicia, diferenciando entre praias, portos e centros azuis e resaltando cun * os recoñecidos por primeira vez.

PRAIAS CON BANDEIRA AZUL EN 2022

PROVINCIA DA CORUÑA 

14 concellos / 36 areais   

A Coruña: As Lapas,  Orzán-Matadero,  Oza,  Riazor e   San Amaro. 

A Laracha: Caión.  

Arteixo, A Hucha,  A Salsa (Repibelo), Barrañán,  Combouzas, O Reiro,    Sabón,   Valcobo,     Porto de Suevos*.  

As Pontes: Lago das Pontes.

Bergondo: Gandarío.

Camariñas:  Arou .  

Carballo: Pedra do Sal,    Razo e  Saíñas.   

Dumbría: O Ézaro.    

Ferrol: A Fragata-O Pareixal, Doniños,  Esmelle  e San Xurxo.

Laxe: Laxe.    

Miño: Perbes-Andahío .  

Oleiros: Bastiagueiro, Espiñeiro, Mera, Naval e  Santa Cristina.

Ponteceso: A Ermida,    Balarés e  O Osmo.

Ribeira: Coroso.       

PROVINCIA DE LUGO 

8 concellos / 18 areais 

Barreiros:  Fontela Valea*,  Coto e A Pasada.  

Burela: A Marosa,  O Portelo  e Ril.

Cervo: O Torno.  

Foz: A Rapadoira,  Areoura, As Polas, Llas e Peizás. 

O Vicedo: Abrela e Xilloi.

Ribadeo: As Catedrais e  Os Castros-Illas.

Viveiro: Area.

Xove: Esteiro       

PROVINCIA DE PONTEVEDRA 

12 concellos / 58 areais 

A Guarda:  Area Grande  e O Forte (Camposancos).  

Illa de Arousa: Area da Secada e  Bao (Camaxe).

Baiona: Barbeira, Concheira, Frades, Ladeira, Ribeira e Santa Marta.

Bueu: Area de Bon, Banda do Río*, Lagos. Lapamán e Portomaior.

Cangas: Areabrava, Areamilla, Liméns, Menduíña e Nerga.

Marín: Aguete, Loira, Mogor, Portocelo, Santo do Mar-A Coviña, (2 praias, 1 solicitude).

Moaña: O Con.

Poio: Cabeceira.  

Ponte Caldelas:  A Calzada (fluvial),

Sanxenxo: A Lapa,  Agra, Areas, Areas Gordas,  Baltar, Bascuas, Canelas, Caneliñas, O Espiñeiro-A Lanzada,  Foxos, Major, Montalvo, Nosa Señora da Lanzada,  Panadeira, Paxariñas, Pragueira e Silgar. 

Vigo: A Punta,  Argazada, Canido, Carril, Fontaíña, Fortiñón, O Vao,  Rodas (Illas Cíes),  Samil, Santa Baia* e  Tombo do Gato.

Vilagarcía de Arousa: Campanario e Compostela.  

PORTOS CON BANDEIRA AZUL EN 2022 

A Coruña  

A Coruña: Real Club Náutico A Coruña-Marina Real.

Boiro: Club Náutico Boiro-Marina Cabo de Cruz. 

Sada: Club Náutico Sada Porto Deportivo Sadamar.

Porto do Son: Real Club Náutico de Portosín. 

Lugo 

Ribadeo: Porto Deportivo de Ribadeo.

Pontevedra: Baiona Monte Real Club de Iates de Baiona. 

Cangas. Porto Deportivo Cangas (Real Club Náutico Rodeira) 

Sanxenxo Real Club Náutico Sanxenxo, Club Náutico Portonovo de Sanxenxo e Porto Deportivo Juan Carlos I de Sanxenxo.  

CENTROS AZUIS 2022 

A Coruña 

Oleiros: Centro de Visitantes do Monumento Natural Costa de Dexo-Serantes e CEIDA-Centro de Extensión Universitaria e Divulgación Ambiental de Galicia.  

A Laracha:  Centro de Interpretación dos Muíños de Auga da Costa da Morte Golmar.  

Camariñas: Centro de visitantes do Faro de Cabo Vilán*  e Museo Man de Camelle. 

Lugo 

Burela: Centro de Educación Medioambiental Gaia  Barco Museo Reina del Carmen.  

Cervo: Carpintería de Ribeira Francisco Fra.  

Pontevedra 

Bueu: Aula de Natureza Cabo Udra e Centro de Interpretación Agrelo.  

Sanxenxo: Centro de Interpretación As Telleiras.  

A Illa de Arousa: Centro de Interpretación da Conserva.

Marín: Centro de Interpretación dos Petróglifos de Mogor  e Ateneo Santa Cecilia.