Entre 2021 e 2022 o impacto das políticas de vivenda do Goberno en Galicia ascende a 230 millóns de euros
Maica Larriba anima á veciñanza da provincia a aproveitar os fondos europeos para a rehabilitación enerxética de vivendas
· A subdelegada do Goberno en Pontevedra valora que a Xunta abrira o prazo para solicitar estas axudas do Plan de Recuperación do Goberno pero solicita a Administración autonómica “implicación e colaboración” para que “non se perda nin un so euro, como xa aconteceu en convocatorias anteriores”
· O Programa PREE 5000 de Rehabilitación Enerxética de Edificios está impulsado polo Ministerio para a Transición Ecolóxica e o Reto Demográfico e financia ata o 100 % das obras de mellora da eficiencia enerxética de edificios situados en concellos do Reto Demográfico
· Máis de 200.000 veciños e veciñas da provincia poden beneficiarse destas axudas
Infogauda / Pontevedra
A subdelegada do Goberno en Pontvedra, Maica Larriba, visitou esta mañá o Concello de Cuntis onde se reuniu co seu alcalde, Manuel Campos, para explorar as axudas do Programa PREE 5000 de Rehabilitación Enerxética de Edificios, financiado con fondos europeos e que impulsa o Ministerio para a Transición Ecolóxica e o Reto Demográfico.
A subdelegada destacou que este Programa materializa “o compromiso do Goberno coa cohesión territorial e a rexeneración urbana mediante a transferencia á Xunta de Galicia de 3,8 millóns para axudas directas para a rehabilitación enerxética de edificios”.
Unhas axudas ás que poden optar todos os veciños e veciñas deste concello así como todas as persoas da provincia que residen nos chamados concellos do Reto Demográfico, é dicir, aqueles municipios que contan con menos de 5.000 habitantes; ou aqueles que dispoñen de menos de 20.000 habitantes, pero ningún dos seus núcleos de poboación supera os 5.000. Maica Larriba quixo animar aos máis de 200.000 veciños e veciñas de Pontevedra residentes nestas localidades a solicitar estas axudas que permiten acometer a rehabilitación enerxética das vivendas, subvencionando ata o 100 % das obras.
O obxectivo é conseguir unha redución do 30 % do consumo de enerxía primaria non renovable dos inmobles e, ademais, mellorar a súa cualificación enerxética. As axudas son canalizadas e convocadas pola Xunta pero con fondos do Plan de Recuperación. Neste sentido, a subdelegada do Goberno demandou “a colaboración institucional e a implicación da Administración Autonómica para que non se perda nin un só euro destinado á recuperación de Galicia, como pasou coa última convocatoria do Plan estatal de Vivenda 2018-2021, que dos 82 millóns que o Goberno transferiu á Xunta, 40 millóns quedaron sen executar. A xestión debe ser eficaz e á altura dun tema tan sensible como o da vivenda”.
Así mesmo, Maica Larriba sumouse á demanda do delegado do Goberno, que solicitou á Xunta de Galicia que poña en marcha a figura do axente xestor. “Unha figura deseñada e demandada polo Goberno ás Comunidades Autónomas que sería de gran axuda, sobre todo, para que os pequenos concellos canalicen estas axudas e que garantiría unha xestión correcta destes fondos, que non podemos permitirnos perder”, explicou.
Plan de rehabilitación e rexeneración urbana
O Plan de rehabilitación de vivenda e rexeneración urbana contempla 6.820 millóns de euros en seis liñas. Catro están xestionadas polo Ministerio de Transportes, Mobilidade e Axenda Urbana e as outras dúas, polo Ministerio para a Transición Ecolóxica e o Reto Demográfico.
Galicia dispoñerá a partir deste ano dunha cifra histórica de 230 millóns de euros para transformar vivendas, cidades e vilas, coas que poderán ser financiadas máis de 3.000 actuacións en fogares galegos e construír 1.100 vivendas de alugueiro social.
Como sucede nesta convocatoria, os programas materialízanse a través dun modelo de cogobernanza coas comunidades autónomas e as entidades locais, ás que o Goberno transfire fondos para que executen directamente ou ben realicen convocatorias de axudas, en función de cada programa.
Ningún comentario:
Publicar un comentario