VIGO

A CIG REALIZOU UNHA MANIFESTACIÓN EN DEFENSA DO SECTOR NAVAL

Con esta mobilización a central sindical denunciou tamén a represión sindical que se vive en Barreras tras o despido do seu  representante no comité de empresa

A Unión Comarcal da CIG de Vigo realizou este xoves unha manifestación en defensa do naval e para reclamar un futuro industrial para a bisbarra

Foto: CIG

Infogauda / Vigo

 A Unión Comarcal da CIG de Vigo realizou este xoves día 15 de xullo, ás 19:00 horas, dende o cruce da Dobrada (Vigo), unha manifestación en defensa do naval e para reclamar un futuro industrial para a bisbarra, ante a grave crise que atravesa o sector, cos dous  principais estaleiros a piques de desaparecer definitivamente. 

 Con esta mobilización a central sindical denunciou tamén "a represión sindical que se vive en Barreras tras o despido do seu  representante no comité de empresa".

INTERVENCIÓN DE PAULO CARRIL, SECRETARIO XERAL DA CIG 

 Ao remate da manifestación Paulo Carril, secretario xeral da CIG, fixo á seguinte interevención:

 "Hoxe estamos aquí para demandar futuro industrial para o sector naval, contra o terrorismo  patronal e contra a represión sindical polo despedimento do compañeiro delegado da CIG en  Barreras, Rafa Pérez. 

 E facemos esta manifestación coa lexitimación dos moitos meses, xa anos, esixindo medidas dos  Gobernos para evitar o naufraxio do sector naval, que estamos a ver que non fan nada. 

 E o que fan é permiten que as Empresas, que os Fondos de Investimento, fagan o que lles pete, por  riba aproveitándose dunha Reforma Laboral que aínda non está derogada para que o capital execute  con total liberdade a desfeita laboral, social e industrial que estamos a vivir. 

 O futuro industrial de Vigo, como en Galiza, está en xogo, senón nos mobilizamos para demandar  viabilidade e carga de traballo para o sector naval e para evitar que noutros sectores industrias,  como o da automoción, a deslocalización, a precariedade e os despedimentos vaian en aumento,  Porque sen industria, non hai futuro. 

 Aquí ninguén está a salvo, tendo en conta a nula política industrial da Xunta, a inacción do  Goberno estatal e o silencio cómplice do Concello de Vigo ante esta realidade. 

 Estamos nunha situación de auténtico “cóctel explosivo”: crise do naval que se está a estender a  boa parte dos estaleiros (Vulcano, Barreras, Metalships, etc), vixencia da reforma laboral e novas  reformas antiobreiras en marcha e a entrada en vigor do convenio provincial do metal. Non pode ser que sexan os consellos de administración das empresas os que decidan o futuro do  sector naval; ten que haber unha acción clara, decidida e contundeante das Administracións  públicas, que para nos pasa por unha intervención pública directa, que Barreras se desprivatice,  volva á SEPI, de onde nunca debera ter saído, e que os xestores pasados e presentes de Barreras den conta nos xulgados do roubo, do espolio e da delincuente xestión que teñen feito no estaleiro, pero  tamén dos centos de despedimentos que nas auxiliares e na principal teñen causado. 

 Non pode ser  que ante o escándalo que está sucedendo en Barreras, as vítimas sexamos os traballadores e os  ladróns de pescozo branco e gravata sigan impunes.  

 Hai que parar esta sangría de desmantelamento do naval. E non se pode deixar pasar máis tempo,  porque corremos o perigo de que Barreras se converta nun novo Vulcano. 

 Non pode ser que sexan os consellos de administración das empresas os que decidan o futuro do  sector; ten que haber unha acción clara, decidida e contundente das Administracións públicas. Hai  que parar esta sangría de desmantelamento do naval. E non se pode deixar pasar máis tempo,  porque corremos o perigo de que Barreras se converta nun novo Vulcano. 

 Por iso desde a CIG levamos meses reclamando unha Saída Galega Xusta da Crise e dun Plano de  Emprego e Industrialización, e que para Salvar o naval de Vigo que pasa pola creación urxente  polas Administracións Públicas dunha Mesa para abordar a crise do naval vigués para tomar 3  urxentes medidas: 

1.- Unha solución estábel e duradeira para o estaleiro de Barreras a través do proceso de retorno ao  sector público. Recuperar a actividade nas instalacións de Vulcano mantendo a concesión actual do  Porto de Vigo para a construción e reparación naval. 

2.- A conformación dun holding entre os distintos estaleiros, empresas auxiliares e empresas transformadoras do metal na ría de Vigo, con participación pública e privada, para proxectos  conxuntos como centrais de compras comúns, deseño etc., e investimentos comúns en tecnoloxía,  I+D+i. 

3.- Pola diversificación da oferta para aumentar a carga de traballo con contratos firmes para  construír e despois un financiamento para desenvolver os proxectos, e todo isto acompañado duns  beneficios fiscais. 

 Que non perdan o tempo, que escoite a Patronal e os quen actúan ao seu servizo, incluso vestidos de buzo con espontáneos e radicais discursos, que con despedimento de Rafa nos van calar, non van  amedrentar, non nos van intimidar a CIG, non lles temos medo. Por iso imos continuar coas  mobilizacións para esixir a readmisión do compañeiro e demandar solucións que garantan o futuro  do sector naval. 

 A CIG, como historicamente vimos facendo, non imos equivocar os tiros nin os pasos a dar e non  imos permitir que se cumpran os peores presaxios para o sector naval. 

 A nosa aposta por defender o sector non vai ter ningún límite na mobilización e na reivindicación  porque se trata dunha industria chave para a comarca e para o conxunto do país. 

 Ánimo e  Adiante!!!"