A GUARDA

Concentración da “Hostalaría Guardesa” por “un Plan de rescate real XA!” 

“Será unha mobilización a nivel galego, na Guarda temos que saír a rúa para salvar o noso emprego” 

 

Infogauda / A Guarda

 Este mércores 24 de febreiro ás 18:30 h, “Hostalaría Guardesa” convoca unha concentración na praza de Avelino Vicente, dentro da convocatoria que realiza a Plataforma pola Defensa da Hostalaría Galega á que está adherida. 

 “A concentración realizarase en consonancia con outras a nivel galego, así haberá concentracións en concellos como Muros, Coruña, Pontevedra, Ribeira, Cangas, Bueu, Vilagarcía, …”, afirman desde a plataforma “Hostalaría Guardesa”.

 A hostalaría reclama “un rescate e axudas directas para un dos sectores máis afectados polas restricións impostas pola Xunta de Galicia. 

 A demanda dun “Rescate Real XA!” e a procura de solucións ante a pasividade das administracións públicas, fai que o conxunto do sector de una a nivel de toda Galicia para manter as reivindicacións e evitar, así, o peche masivo dun sector que agoniza por falta de apoio real das institucións”. 

 Dende “Hostalaría Guardesa” animan a participar achegando elementos significativos da hostalaría para facer ruído.