O presidente da Xunta de Galicia participou este sábado na inauguración das novas instalacións deportivas do club en Mos (Pontevedra)
Feijóo destaca a importancia da nova Cidade Deportiva do Celta para reforzar o futuro do fútbol e do deporte galego
Lembra que o club merecía contar cun espazo de “primeira”: “Unhas instalacións propias, de última xeración, á altura da súa relevancia e abertas aos veciños da área”, salientou
Infogauda / Mos
O presidente da Xunta de Galicia, Alberto Núñez Feijóo, salientou hoxe a importancia da nova Cidade Deportiva “Afouteza” do Real Club Celta de Vigo para reforzar o futuro do fútbol e do deporte galego.
Feijóo destacou durante o acto de inauguración oficial do complexo en Mos que servirá para adestrar aos talentos “do presente e do futuro do Celta e, en consecuencia, do fútbol galego” e manifestou que a entidade deportiva merecía contar cunha Cidade Deportiva “de primeira” para o primeiro equipo e os conxuntos da canteira.
“Unhas instalacións propias, de última xeración, á altura da súa relevancia, e abertas aos veciños da área”, incidiu, ao tempo que lembrou que a súa posta en marcha fai realidade o desexo expresado polo club como unha “necesidade imperiosa”.
Na súa intervención, o presidente recordou o apoio da Xunta de Galicia ás aspiracións do Celta para que continúe a ser un “estandarte do Vigo metropolitano e de toda Galicia”. Así mesmo, precisou que o club contribuíu “ao mellor da historia do deporte galego” e que, como “patrimonio deportivo” de todos, as Administracións deben entender o seu papel, respectalo e apoialo.
Ningún comentario:
Publicar un comentario