O ROSAL

O Equipo de Goberno Municipal do Concello do Rosal vai presentar o proxecto de renovación e mellora do seu mercado  

Será o vindeiro martes 28 de xullo ás 20.00 h no Salón de Exposicións do Concello do Rosal (baixo do Concello)  

Coa reforma da praza de abastos búscase camiñar cara un mercado de excelencia para dinamizar o comercio local, apostar polo consumo de produtos de proximidade e darlle vida á contorna   

Infografía do previsible aspecto que vai ter o interior de praza de abastos do Rosal, logo da súa renovación e mellora

Fonte: C.O.R.

Infogauda / O Rosal

 O Concello do Rosal remodelará a súa praza de abastos para transformala nun centro de comercio local e de proximidade que dinamice a contorna e que conte con todas as implementacións necesarias para ser un mercado de excelencia. O Equipo de Goberno Municipal invita a toda a veciñanza a participar o vindeiro martes 28 de xullo a partir das 20.00 horas, no Salón de Exposicións do Concello do Rosal (baixo do Concello), na presentación do proxecto de renovación e mellora do mercado.

 Este novo proxecto, enmarcado no plan de desenvolvemento local, é unha aposta do Equipo de Goberno Municipal polo comercio de proximidade e pola concepción do mercado como un punto de dinamización económica e social do núcleo urbano, promovendo actuacións que fagan o comercio local máis atractivo e competitivo, fomentando a compra de produto local de proximidade e convertendo a praza de abastos nun lugar de encontro e convivencia dos veciños e veciñas. “Queremos que o Mercado se converta nun polo de atracción para novas persoas emprendedoras, para o comercio local e para a propia veciñanza”, sinala a alcaldesa, Ánxela Fernández. 

OBXECTIVO: LOGRAR UN MERCADO DE EXCELENCIA

 Con estas melloras o Concello da os primeiros pasos para converter a praza de abastos nun mercado de excelencia, selo outorgado pola Xunta de Galicia a aqueles mercados capaces de responder aos retos de modernización e innovación sen perder a súa autenticidade e tradición, a proximidade coa veciñanza e o trato personalizado. Para acadar este distintivo de excelencia, a Xunta valorará, entre outras cousas, a mellora das instalacións do mercado, que tamén debe ser accesible; a creación e mellora dos servizos para a clientela; a organización, unidade de xestión e profesionalidade dos praceiros e praceiras; a atención ao cliente e a prestación de servizos; e a implicación e integración do mercado na vida social do concello. 

 Para a celebración deste acto estableceranse todos os protocolos de prevención necesarios para garantir a saúde de toda a veciñanza participante.