A GUARDA

O BNG APOIARÁ  A FORMALIZACIÓN DA ADHESIÓN  DO CONCELLO DA GUARDA A REDE ÁGORA  

Anxo Lois Baz Vicente (portavoz municipal do BNG no Concello de A Guarda): “Consideramos un logro que o goberno municipal recapacitase e  formalice a adhesión do Concello á rede Ágora cumprindo así co acordo plenario aprobado a instancias do BNG” 

Anxo Lois Baz Vicente, portavoz municipal do BNG no Concello de A Guarda

Infogauda / A Guarda 

 “A Rede Ágora polo Espazo Público promovido pola Deputación de Pontevedra, marca como obxectivo que de aquí ao ano 2023 o Concello incremente de forma substancial o espazo reservado para as persoas, itinerarios peonís e para a utilización da bicicleta. Trátase dunha iniciativa para revalorizar o espazo público e consideralo como un dereito fundamental para a veciñanza”. Dese xeito vén de pronunciarse Anxo Lois Baz Vicente, portavoz municipal do Bloque Nacionalista Galego, no Concello de A Guarda.

 “Ten como obxectivo -engade o voceiro do BNG - garantir a mobilidade peonil que estará por diante na prioridade sobre outros modos de transporte na seguinte orde: bicicletas, vehículos de mobilidade persoal, transporte colectivo e automóbil particular.  

 Promoverá a mobilidade natural e activa fronte á motorizada tanto nos núcleos urbanos como nos rurais, creando espazos de preferencia peonil nas rúas e prazas centrais da nosa vila e  nas parroquias”.  

 Asemade, Anxo Lois Baz declarou: “Consideramos un logro que o goberno municipal recapacitase e someta ao pleno a formalización da adhesión do Concello á rede Ágora cumprindo así co acordo plenario aprobado a instancias do BNG. No pleno pasado esta proposta fora aprobada co voto en contra do grupo de goberno do PSOE”.  

 O portavoz nacionalista animou “ao goberno do PSOE a que tome en serio esta iniciativa,  na que vai contar coa man tendida do BNG para a súa posta en marcha  e pídelle que, aínda que o prazo de remate é no ano 2023, comece o antes posibel a tomar medidas que son urxentes na nosa localidade”.