O ROSAL

Nace a Plataforma para a  Defensa da Sanidade Pública do Rosal  

· Aglutina a todos os sectores do municipio e arranca cunha táboa de reivindicacións e melloras na sanidade da contorna  

Nas imaxes pódese apreciar a asistencia de veciñas e veciños do Rosal no acto convocado polo Concello para constituír a Plataforma para a Defensa da Sanidade Pública do Rosal

Fotos: C.O.R.

Infogauda / O Rosal

 “Tras o deterioro progresivo dos servizos sanitarios de atención primaria no municipio e a falta de solucións”, o Concello vén de constituír a Plataforma para a Defensa da Sanidade Pública do Rosal, que nace aglutinando a todos os sectores do municipio  “para denunciar as carencias dos servizos de atención primaria mediante a denuncia pública de carencias estruturais ou puntuais da sanidade pública, a través da convocatoria de actos informativos e mobilizacións e adheríndose a convocatorias de outras plataformas en defensa da sanidade pública”.  

Táboa de reivindicacións 

 A plataforma arranca a súa andaina cunha táboa de reivindicacións á Consellería de Sanidade da Xunta de Galicia, “esixencias que buscan dar solución as necesidades e carencias actuais na contorna e poñer así freo aos recortes nos servizos da sanidade pública, algo que está poñendo en perigo a vida das persoas. A sanidade, igual que a educación ou o transporte público, deben ser cuestións transversais”, como asegurou a alcaldesa do Rosal, Ánxela Fernández. 

 Entre as reivindicacións atópanse “a ampliación do cupo de persoal sanitario do centro de saúde do Rosal cunha praza para persoal médico, dúas prazas para persoal de enfermería e coa recuperación da praza de matrona, ademais da ampliación da consulta de pediatría a todos os días da semana e a cobertura de todas as baixas e vacacións do persoal sanitario tanto no centro de saúde como no consultorio médico de Tabagón”. Entre as demandas tamén se recolle que “a xestión do transporte programado se faga sen antepoñer a rendibilidade do servizo aos tempos e condicións do transporte e sen atentar contra a seguridade e calidade de vida dos usuarios e usuarias, como está a suceder na actualidade co servizo de hemodiálise”.  

 As demandas da plataforma recollen necesidades non soamente no concello rosaleiro, senón tamén na comarca. Así, pide que “o PAC de urxencias da Guarda conte con doble equipo todos os días, garantindo a atención de urxencias de xeito continuado; a ampliación do horario de asistencia da ambulancia de Tomiño ás 24 horas para evitar a falta de cobertura actual; o establecemento dun servizo de radioloxía no centro de saúde da Guarda e a posta en marcha de liñas de transporte público que garantan a accesibilidade diaria e en horarios razonables aos centros sanitarios de referencia”.  

 A constitución desta plataforma foi aprobada en pleno por unanimidade o pasado mes de outubro para “facerlle fronte á situación na que se atopa a sanidade pública no Concello do Rosal que, se ben non é o único concello da comarca afectado, si é un dos municipios no que os problemas teñen unha incidencia maior, coa peor ratio en termos de usuarios e usuarias por persoal sanitario e cunha precarización xeralizada que se acentúa canto máis nos achegamos a zonas rurais”, como salienta a alcaldesa. 

 Ademais, “dende o Concello do Rosal e a nova plataforma anímase a toda a veciñanza a participar na manifestación en defensa da sanidade que se celebrará na Guarda o vindeiro 14 de marzo convocada pola Plataforma en Defensa da Sanidade Pública”.