CINEMA
Benedicta, de Xurxo Chirro, preséntase no Festival de Cine de Ourense
Xurxo Chirro, crítico e director de cinema, guionista, investigador e realizador de A Guarda
Foto: Infogauda
Infogauda / A Guarda
A curtametraxe de Xurxo Chirro*, titulada Benedicta, formará parte da sección de curtametraxes do Ourense Film Festival.
Un traballo que é unha coprodución entre Proxecto Socheo e a asociación arousán de O Faiado da Memoria. O proxecto baséase en rescatar parte da memoria da Guarda por medio das lembranzas da que foi a súa veciña: Benedicta Rodríguez Sobrino.
Segundo Chirro “o interese da proposta está na reflexión sobre o valor do documento, da oralidade, da narración e da palabra”.
O festival de cine de Ourense acontecerá do 27 de setembro ao 5 de outubro.
* Xurxo Chirro, alter ego de Xurxo González Rodríguez (A Guarda 1973), é licenciado en Historia da Arte pola Universidade de Santiago de Compostela e doutor en Historia da Arte pola UNED. Traballou para a Axencia Audiovisual Galega e na Axencia Galega das Industrias Culturais (AGADIC), organismos da Xunta de Galicia. Investigador para o Consello da Cultura Galega e para a USC, profesor no Máster de Conservación do Patrimonio (USC). Traballou para o Instituto Cesing. Creador de contenidos da Axencia Audiovisual Galega (AAG), coordinador das plataformas na rede de Teutubo, Flocos.tv e Canletv, asesor técnico nas comisións á producción audiovisual da Xunta de Galicia (2007-2012). Programador galego do Filminho: Festa do Audiovisual Galego e Português (2008-2010). Comisionado do ICAA do Ministerio de Cultura (2010-2011). Coordinou os libros Manoel de Oliveira (CGAI) e Documentación da videocreación en Galicia nos anos 80 (CGAC). Crítico de cinema, colaborou con varios xornais e revistas. Como guionista e director realizou os seguintes documentais: Argazo (2005), Os señores do vento (2008), 36/75 (2009) e 13 Pozas (2009), Cellular Movie (2010), Vikingland (2011) e Une histoire sole (2013).
Na traxectoria cinematográfica Xurxo Chirro tamén temos que salientar a curta Jeanette (2016), que participou na sección non competitiva do Festival de Cine de Ourense (OUFF).
Xurxo Chirro é o director do equipo técnico de Proxecto Socheo, “(...) unha iniciativa compartida que quere localizar, estudar, inventariar e dar a coñecer as imaxes que foron gravadas na Guarda e no Baixo Miño, co obxectivo de salvagardar un patrimonio audiovisual local e proxectalo, sen restricións, cara o mundo (...)”.
Ningún comentario:
Publicar un comentario