GOIÁN (TOMIÑO)

A Deputación de Pontevedra destinará 200.000 € ao acondicionamento do Espazo Fortaleza de Goián, no marco do proxecto ‘Visit Rio Minho'  

A actuación forma parte da creación do primeiro parque transfronteirizo de lecer de Europa, froito da unión do Castelinho e a Fortaleza

 Vista parcial do Espazo Fortaleza, en Goián

Foto: D. PO.

Infogauda / Goián

 A Deputación de Pontevedra vén de abrir o proceso de licitación para adxudicación de obras de mellora e acondicionamento do Espazo Fortaleza de Goián, en Tomiño, no marco do proxecto de cooperación europea Visit Rio Minho, cofinanciado ao 75% por fondos FEDER. As actuacións contan cun orzamento total que ascende a 199.963,43 € e consistirán na mellora da accesibilidade e da integración ambiental e paisaxística da contorna da fortaleza. A data límite para a presentación de ofertas é o vindeiro 2 de xullo, ás 10:00 horas. 

  As obras forman parte das accións de "Cualificación e valorización da rede de sendeiros verdes transfronteirizos" do proxecto Visit Rio Minho, e teñen por obxectivo a mellora da accesibilidade por medio da ordenación e o acondicionamento dos percorridos de acceso, tanto ao recinto fortificado coma ao parque e á praia fluvial.  

 Tamén está previsto a creación dun espazo polivalente para a dinamización do parque, enfocado á posta en valor da fortaleza de San Lourenzo. Buscase ademais, lograr unha maior integración e interpretación do monumento da fortaleza no seu contorno, de forma que se consiga unha maior visibilidade da construción histórica e a revalorización do conxunto. Debido ao emprazamento da fortaleza de San Lourenzo en zona protexida pola Rede Natura, todas as actuacións que se executen deberán ser respectuosas co medio ambiente.  

Primeiro parque transfronteirizo de lecer de Europa  

 As actuacións están orientadas á creación do primeiro parque transfronteirizo de lecer de Europa, resultado da conexión do Espazo Fortaleza de Goián e o parque do Castelinho de Vila Nova de Cerveira, mediante a creación dunha ponte internacional que una ambos espazos de ocio.  

 Visit Rio Minho é un proxecto de cooperación europea cofinanciado ao 75% polo Fondo Europeo de Desenvolvemento Rexional, a través do Interreg V-A España-Portugal (POCTEP) 2014-2020. Son socios de Visit Rio Minho a Deputación de Pontevedra (socio principal), a AECT Rio Minho, o Centro Tecnolóxico do Mar - CETMAR, a Comunidade Intermunicipal do Alto Minho - CIM Alto Minho, o Centro de Estudios Euro Rexionais Galicia Norte de Portugal (FCEER), a Universidade de Vigo e os concellos de Vila Nova de Cerveira, Caminha, Melgaço, Monçao, Paredes de Coura e Valença.