A Xunta de Galicia abre por primeira vez a inscrición nas listas de emprego temporal para xerocultor e persoal de servizos xerais
As persoas interesadas poderán anotarse ata o vindeiro 30 de abril
Calquera que cumpra os requisitos de titulación poderá anotarse nestas listas
As instancias pódense descargar na web da Xunta de Galicia, no apartado ‘Listas de Contratación’
Infogauda / Galicia
A Xunta de Galicia abre o prazo de
inscrición nas listas de emprego temporal da Administración galega para
cubrir postos de traballo das categorías profesionais de xerocultor/a e
persoal de servizos xerais. Este prazo permanecerá aberto ata o vindeiro
30 de abril, segundo recolle a resolución da Dirección Xeral da Función
Pública no Diario Oficial de Galicia (DOG) de hoxe.
É a primeira
vez que a Xunta de Galicia abre a inscrición nestas dúas listas, que
foron incorporadas con ocasión do acordo de integración do persoal do
Consorcio Galego de Servizos de Igualdade e Benestar no V Convenio do
persoal laboral da Xunta, un acordo de integración que foi subscrito en
2017 entre a Xunta e os sindicatos CIG, CC.OO. e UGT.
O persoal
xerocultor ten como función a de asistir á persoa usuaria na realización
das actividades básicas e instrumentais, tanto sociais como sanitarias,
da vida cotiá que non poida realizar por sí misma a causa da súa
discapacidade, e efectuar aqueles traballos encamiñados á súa atención
personal e da súa contorna.
En canto ao persoal de servizos
xerais, ten entre as súas funcións a realización de tarefas
administrativas e de apoio á xestión no centro, servizo ou unidade
respectiva; a apertura e peche dos centros ou unidades; a distribución
de comidas e adecentamento de comedores; as tarefas de lavandería,
mantemento e apoio ás funcións xerais, así como labores de recepción,
portería, atención e información ás persoas usuarias, entre outras.
Todas
aquelas persoas interesadas en apuntarse nestas listas de emprego
temporal deberán presentar a instancia que se pode descargar na web da
Xunta de Galicia (www.xunta.gal),
no apartado ‘Listas de Contratación’. Calquera persoa que cumpra os
requisitos de titulación poderá anotarse nestas e noutras bolsas abertas
xa para o nomeamento de funcionarios interinos e para contratación de
persoal laboral temporal, que a Xunta utiliza para cubrir vacantes,
facer substitucións e reforzar os servizos públicos.
Entre as
listas abertas están as de veterinarios, escala superior e escala
técnica de finanzas, veterinario, médico xeriatra, enfermeiro,
fisioterapeuta, director de gardería infantil, xefe de cociña, auxiliar
de clínica, auxiliar de fogar, bombeiro forestal ou bombeiro forestal
condutor.
Ningún comentario:
Publicar un comentario