A Guarda exalta a lamprea do río Miño
Cuns fins de semana gastronómicos, do 23 de marzo ao 14 de abril
Infogauda / A Guarda
Todas as persoas que desexen degustar este ciclóstomo preparado á bordalesa poderán achegarse á Guarda as fins de semana do 23 de marzo ao 14 de abril.
O Concello de A Guarda, en colaboración cos establecementos hostaleiros da vila, organiza as xornadas gastronómicas «Lamprea do Miño», que se celebrarán en 10 bares e restaurantes co obxectivo de potenciar A Guarda como destino gastronómico da lamprea.
Durante estas xornadas, as veciñas e veciños da nosa vila e a súa contorna poderán degustar a lamprea na súa preparación máis tradicional, á bordalesa, a un prezo único por ración de 22€. A lamprea enteira terá un prezo de 65€. Dada a larga elaboración que precisa este manxar é preciso a reserva previamente nos restaurantes.
Os establecementos adheridos a esta campaña son os restaurantes Area Grande, Arruaz, Brétema, Bar Casa Aquilino, Enxebre, La Pizzicata, Marbella, O Cangrexal, O Roxo e Xantar.
Esta nova iniciativa gastronómica transformouse o ano pasado da vontade conxunta de impulsar a gastronomía local e a súa riqueza, centrando os esforzos na exaltación dun dos manxares máis apreciados do noso río. Este ano aumentáronse as fins de semana para que todos os interesados podan degustar a lamprea na súa elaboración máis tradicional e como leva preparándose durante xeracións na Guarda.
Dentro desta mesma campaña, o alumnado de 6º de primaria dos centros de ensino de A Guarda participarán na xornada didáctica «Coñecedes a lamprea?», unha iniciativa que leva organizando dous anos. Dada a boa acollida da proposta, os cativos repetirán a experiencia, na que poderán achegarse ás técnicas de pesca da lamprea no río Miño, agora en temporada.
Esta xornada componse de dúas partes: unha primeira actividade didáctica que se realizará na Casa dos Alonso, onde os nenos poderán coñecer máis polo miúdo a lamprea a partir dunha reportaxe audiovisual sobre a pesca desta na desembocadura do Miño. Contarán, ademais, co testemuño de pescadores, que explicarán a súa profesión aos cativos mediante os aparellos de pesca que empregan e, como non, as vivencias e anécdotas.
Deseguido, o alumnado poderá elaborar na aula uns debuxos coa temática «Desembocadura do Miño e a lamprea». Os traballos exporanse na Praza de Abastos dende o sábado 13 de abril.
Exaltación da lamprea
A lamprea é un produto de temporada polo que estas xornadas organízanse para dar a coñecer a lamprea do Miño como un produto gastronómico de excelencia.
A temporada de pesca na desembocadura do Miño comeza en xaneiro e finaliza a mediados de abril e durante estes meses pódese observar a decenas de pescadores nas súas embarcacións como realizan este duro traballo largando a rede, coñecida como lampreeira, e halándoa mentres as correntes do río os desprazan.
Como peche a esta campaña está previsto a realización dunha exhibición de cociña o sábado 13 de abril na Praza de Abastos. Esta actividade amosará como elabórase unha receita de lamprea.
Programación nas fins de semana
É moi interesante percorrer os sendeiros das praias da desembocadura do río Miño contemplando a paisaxe e os pescadores de lamprea traballando durante a subida da marea. Nestas praias pódense observar na marea baixa, estruturas de varias pesqueiras construídas en pedra, que debido a súa antigüidade descoñécese si tamén empregaban para capturar as lampreas ademais de peixes.
Ademais da programación cultural e deportiva:
Sábado 30 de marzo:
· Carreira de Orientación
(precisa inscrición ata o 27 de marzo)
· Concerto do Coro Gli
Pasionatti no Centro Cultural
Sábado 6 de abril:
· Concerto e gravación do disco
do grupo Na Revolta no Centro Cultural
Domingo 7 de abril:
· Concerto de Corda xuvenil – infantil KV2211 no Centro Cultural
· Proba de Enduro. Precisa inscrición
ata o 27 de marzo)
Sábado 13 de abril:
· Exhibición culinaria: Cociñar a lamprea
do Miño
·
21.00 horas. Serán das Festas de
Pascua, na Praza de Buxán
Domingo 14 de abril:
· 11.00 horas. Bendición de ramos e
palmas na Praza de San Bieito
Ningún comentario:
Publicar un comentario