LÍNGUA

Madrygal réndelle homenaxe á investigadora rosaliana Victoria Álvarez Ruiz de Ojeda  

Valentín García participou en Vigo na presentación da separata desta revista editada polo Centro de Estudos Galegos da Universidade Complutense de Madrid  

O novo volume presentouse no marco dunha homenaxe a Rosalía de Castro e á principal investigadora da súa obra, recentemente falecida

Infogauda / Vigo

  O secretario xeral de Política Lingüística, Valentín García, participou hoxe ao serán na homenaxe que a Secretaría Xeral de Política Lingüística, o IES de Mos e o Club de Lectura “Amibros” lle renderon no Auditorio Municipal de Vigo, tanto a Rosalía de Castro, cuxo nacemento se celebrará o vindeiro 24 de febreiro, como á que foi, ata o seu recente pasamento, a maior estudosa da súa vida e obra: Victoria Álvarez Ruiz de Ojeda. Ao finalizar o acto, os asistentes foron agasallados coa separata da revista do Centro de Estudos Galegos da Universidade Complutense de Madrid, Madrygal, Homenaxe á investigadora Victoria Álvarez Ruiz de Ojeda.

 O secretario xeral de Política Lingüística sinalou que “non é esaxerado afirmar que, se na actualidade sabemos moito máis da vida de Rosalía de Castro que os nosos inmediatos antecesores foi grazas ás contribucións de Victoria Álvarez, quen sempre traballou movida por un amor sincero cara a Rosalía de Castro e mais por unha tendencia, case natural nela, ao rigor científico e ao traballo meticuloso”.

 Ademais de Valentín García, interviñeron no acto Xesús Alonso Montero, investigador, académico da lingua e viúvo de Victoria Álvarez Ruiz de Ojeda, e Patricia Arias, coordinadora da separata de Madrygal.

María Álvarez Ruiz de Ojeda

 María Victoria Álvarez Ruiz de Ojeda (Vigo, 1961-2018) foi unha profesora e investigadora galega especialista na figura de Rosalía de Castro, pois realizou importantes achados documentais relacionados coa súa biografía e publicou numerosos traballos referidos á súa obra. Docente no IES de Mos, formou parte do padroado das fundacións Rosalía de Castro e Blanco Amor.