O BNG congratúlase da adhesión do concello da Guarda a Plan Revitaliza de compostaxe
Ángel Luis Baz Vicente, portavoz municipal do BNG no Concello de A Guarda: “Despois de 3 anos de mocións e escritos presentados polo BNG, ao final o goberno do PSOE caeu da burra e adhírese ao Plan Revitaliza de Compostaxe da Deputación de Pontevedra”
Ángel Luis Baz Vicente, portavoz municipal do BNG no Concello de A Guarda
Infogauda / A Guarda
“O BLOQUE NACIONALISTA GALEGO congratúlase polo cambio de opinión do Alcalde da Guarda e do goberno municipal do PSOE, que despois de 3 anos decidiu integrarse dentro do Plan Revitaliza da Deputación de Pontevedra”, afirmou Ángel Luis Baz Vicente, portavoz municipal do BNG no Concello de A Guarda.
“Tiveron que pasar 3 anos - sinala Ángel Luis Baz -, 3 anos perdidos de axudas para o desenvolvemento dunha estratexia de xestión do lixo baseada na compostaxe. Como sempre os concellos da comarca anticipáronse á Guarda, grazas a un goberno totalmente sumido na inacción e na autocompracencia”.
O portavoz municipal do BN no Concello de A Guarda indica igualmente: “O Plan Revitaliza nas diferentes liñas de apoio, sufragaría as asistencias técnicas para a redacción dun Plan municipal de recollida e tratamento dos residuos domiciliarios, a adquisición de vehículos, minitrituradoras,...”
“Preocúpanos o descoñecemento do Plan Revitaliza do grupo de goberno, cando o seu concelleiro delegado nin sequera sabe de que van as liñas de dito plan. Un despropósito do goberno do PSOE”, sinala Ángel Luis Baz.
“O BNG pula por un modelo de xestión do lixo diferente ao que se está a desenvolver na Guarda, cunha decidida aposta pola compostaxe, por un tratamento máis respectuoso do medio ambiente, lembrando que ademais do aforro da factura que temos que pagar a SOGAMA, significaría a creación de postos de traballo”, conclúe o portavoz nacionalista.
Ningún comentario:
Publicar un comentario