ENSINO

Primeira xornada de folga nun centro que desde 2014 perdeu un 20% do seu persoal  

Profesorado e estudantes paralizan a ESAD no primeiro día de folga para esixir a fin dos recortes de persoal 

Profesorado e estudantes levaron as súas demandas até a sede da Xunta, esixindo que non se poña en risco o prestixio e calidade educativa da única escola que imparte estes estudos en Galicia

Foto: CIG

Infogauda / Vigo

 A ESAD (Escola Superior de Arte Dramática de Galicia), con sede en Vigo, vive hoxe o primeiro dos tres días de folga convocados para esixir a restitución dos seis postos de traballos perdidos nos últimos dous anos. Co centro totalmente paralizado - segundo afirmaron a este xornal dixital fontes da CIG - Ensino - profesorado e estudantes levaron as súas demandas até a sede da Xunta, esixindo que non se poña en risco o prestixio e calidade educativa da única escola que imparte estes estudos en Galicia. 

 Despois da aprobación maioritaria dos seus traballadores e traballadoras a pasada semana, este luns deu comezo o primeiro dos tres días de folga cos que se pretenden denunciar os recortes de persoal aos que a Consellaría ten sometido este centro nos últimos anos. 

 En concreto, para este curso académico a dirección do centro reclamaba tres novas vacantes e a Consellaría, tras o informe do funcionario da inspección educativa, non só non concedeu ningunha senón que eliminou outras tres, adxudicando só 34 interinidades, das 40 que a dirección e o equipo docente consideraban necesarias. 

 Esta política de recortes levou a que desde 2014 o cadro de persoal da ESAD se vira reducido nun 20% cando, despois dos peores anos da crise económica, se recuperou o número de alumnado matriculado nos primeiros cursos. 

Esixen a dimisión do inspector e a intervención do conselleiro de Educación 

 Tal e como denuncia a CIG-Ensino, o responsábel da toma destas decisións foi o inspector, Gustavo Lorenzo Prozzo, que amosa unha actitude totalmente hostil e arbitraria na súas funcións con respecto á ESAD. 

 Este inspector, segundo sinalan, intentou cambiar o perfil das prazas solicitadas e informou negativamente sobre a concesión das vacantes, presionando a dirección do centro e co menoscabo da autoridade do profesorado. En particular, o inspector amosa “un enfermizo interese en menosprezar a Escola Superior de Arte Dramática”, na que se imparten estudos superiores, equivalentes ao grao universitario, obviando todas as particularidades que teñen estas ensinanzas en canto a atribución e horario docente. 

 Pola súa parte, tanto o xefe territorial da Consellería de Educación como a Dirección Xeral de Centros e Recursos Humanos negáronse a mediar no conflito, o que provocou que finalmente se consumase o recorte de persoal docente para o presente curso escolar. 

 A CIG-Ensino aproveitou a concentración desta mañá para pedir a dimisión do inspector de zona e para demandar da Consellaría a cobertura inmediata das prazas necesarias para o arranque do curso no centro, apelando directamente á responsabilidade do conselleiro de Educación. 

Novas concentracións, martes e mércores 

 Se non existe ningunha resposta por parte da administración, están previstas concentracións para o martes e mércores fronte ao edificio da Xefatura Territorial da Consellaría de Educación en Pontevedra ás 11 da mañá, e o sindicato estudará co persoal da ESAD outras accións a emprender até ser atendidas as súas demandas.