A GUARDA

ARRANCAN AS OBRAS DE REFORMA INTEGRAL DA RÚA CONCEPCIÓN ARENAL 

· O deputado de Mobilidade Uxío Benítez explica que nas primeiras semanas renovaranse o saneamento, abastecemento e pluviais na praza Avelino Vicente  

Infografía de como quedará a rúa Concepción Arenal unha vez rematadas ás obras de reforma integral

Fonte: D. PO.

Infogauda / A Guarda

 As obras de reforma integral da rúa Concepción Arenal en A Guarda xa están en marcha. Persoal da empresa ‘Obras, Reformas e Saneamentos S.L.’ está xa a traballar no proxecto de ‘Recuperación de espazos e mellora da mobilidade peonil na EP-3401 de acceso ao porto’ que está a desenvolver o departamento de Mobilidade da Deputación de Pontevedra. Segundo explica o deputado Uxío Benítez Fernández, “as obras durarán uns oito meses e nestas primeiras semanas centraranse na renovación do saneamento, o abastecemento e nas canalizacións de pluviais na praza Avelino Vicente”.  

Infografía de como quedará a Praza de Avelino Vicente González cando rematen ás obras

Fonte: D. PO.

 No día de hoxe asinouse formalmente a acta de replantexamento do proxecto, para logo iniciar os traballos directamente na rúa, co marcado das canalizacións e a instalación da sinalización vertical e horizontal de obra. Nos vindeiros días comezarase a ver maquinaria pesada, xa levantando o firme da praza Avelino Vicente González, coa idea de que quede cos servizos instalados, totalmente pavimentada e cos bolardos colocados dentro duns dous meses.   

 A segunda fase de traballo será o treito central da rúa (onde xa non se instalarán novos servizos, xa que os actuais están en bo estado) para posteriormente executar nunha terceira fase a nova praza diante do exconvento de San Bieito. “A intención - segundo dixo Benítez -, é ir realizando todas as actuacións mantendo sempre desvíos abertos para que o tráfico poida acceder ao porto, aproveitando as diferentes interseccións coas rúas paralelas.   

 Quedará para o último mes a colocación de todo o mobiliario urbano (bancos, papeleiras, pérgolas, bancos corridos de cemento), e tamén a plantación de árbores e acondicionamento das zonas verdes. Hai que lembrar que as obras na rúa Concepción Arenal reformarán 8.527,85 metros cadrados de espazo público nunha lonxitude de 670 metros”. 

 “A mellora integral da rúa Concepción Arenal, cuxa titularidade pasará da Deputación ao Concello unha vez rematada a obra, busca recuperar o espazo público da rúa para veciñas e veciños deixando claro que a circulación peonil é a principal na estrada, pero fomentando tamén a convivencia co tránsito rodado”. Segundo lembra o deputado Uxío Benítez, “a nova rúa promoverá os tránsitos peonís cara ao Porto creando un espazo de grande calidade urbana que será exemplo de como a Deputación está a implantar na provincia un novo modelo de Mobilidade. Xa aconteceu en Sanxenxo coa reforma de Luis Rocafort: a nosa prioridade son as persoas e o resultado está á vista, con parabéns da veciñanza e dos turistas”, destacou o nacionalista.  

ACCESO AO PORTO POLA ZONA SUR

 O deputado de Mobilidade volveu destacar que a nova rúa acadará o máximo aproveitamento por parte da cidadanía cando se desenvolva o novo acceso ao Porto pola zona sur -que a Xunta debe tramitar como proxecto sectorial- e que permitirían retirar o tráfico pesado do centro da vila.