TURISMO

‘Vive o Camiño’ arranca este martes no Rosal con contacontos e concertos no Camiño Portugués e no Camiño Portugués da Costa 

A proposta para este concello pontevedrés inclúe os espectáculos de Anxo Moure&Servando Barreiro e a actuación musical de Najla Shami dúo

A programación prevista para a vindeira semana tamén inclúe espectáculos teatrais e musicais nos concellos de Oia e no concello coruñés de Dodro  

Impulsada por Turismo de Galicia, a iniciativa promoverá durante o verán ambos itinerarios xacobeos con máis de 40 actividades de balde e para todos os públicos  

Forma parte dos compromisos do Plan director do Camiño, que dedica este 2018 á posta a punto e dinamización de ambos itinerarios xacobeos

Infogauda / Santiago de Compostela

 O programa de artes escénicas Vive o Camiño arranca o vindeiro martes 31 de xullo no concello pontevedrés do Rosal coa primeira das máis de 40 actividades de balde e dirixidas a todos os públicos que se celebrarán nos concellos galegos do Camiño Portugués e do Camiño Portugués da Costa ata setembro. Impulsada por Turismo de Galicia, a iniciativa forma parte dos compromisos do goberno galego, enmarcados no Plan director do Camiño que este ano dedica a ambos itinerarios.  

 A primeira parada de Vive o Camiño, no concello do Rosal, incluirá a particular proposta de contos e historias das árbores do Camiño Portugués a cargo de Anxo Moure que concienciará da importancia de protexer o patrimonio forestal da ruta xacobea. Será a partir das 20,00 horas e estará acompañado pola música en directo de Servando Barreiro. A continuación, ás 21,30 horas será a quenda de Najla Shami dúo, con Camiños de culturas que inclúe orixinais mesturas entre música galega e outras de sons africanos, brasileiros e mesmo co jazz. Os espectáculos celebraranse na explanada do Horizonte (Portecelo) e, en caso de choiva, trasladarase á Praza do Calán (San Xián 7, baixo a carpa).  

 Tras O Rosal, a programación prevista para a vindeira semana ao abeiro de Vive o Camiño incluirá o concello de Oia o mércores 1 de agosto coa proposta dos contacontos O Camiño que camiña con nós, de Celso Fernández Sanmartín, Celsiño, a partir das 21,30 horas na eira do convento de Santa Mª de Oia. A partir das 22,00 horas actuará no mesmo escenario Najla Shami dúo. En caso de choiva celebraranse no centro sociocultural de Pedornes. O xoves 2 de agosto, o concello de Dodro acollerá os espectáculos de Anxo Moure ás 20,00 horas e de Najla Shami dúo, a partir das 21,00 horas. No CPI Eusebio Lorenzo Baleirón.  

Exposición da ruta xacobea 

 O calendario de Vive o Camiño estenderase ata o vindeiro mes de setembro e incluirá os concellos de Porriño, Nigrán, Baiona, Mos, Valga, Vigo, Redondela, Soutomaior, Vilaboa, Pontevedra, Barro, Caldas de Reis, Tui, Portas, A Guarda, Pontecesures, Padrón, Rois, Teo e Ames. En total programaranse 44 actividades de balde, entre contacontos e actuacións musicais, a cargo de diferentes artistas con traxectorias recoñecidas e cunha ampla experiencia no mundo artístico. Estas accións irán acompañadas dunha exposición informativa tanto do Camiño Portugués como do Camiño Portugués da Costa.