A GUARDA

A Guarda vestirase de flores na fin de semana do Corpus Christi  

· Decenas de veciñas e veciños traballarán durante a noite do sábado na decoración das rúas coas tradicionais alfombras floráis.  

· Esta será a derradeira fin de semana para gozar da ruta gastronómica «Tapearte».   

A alfombra da Praza do Reló en 2017, antes e despois da solemne procesión do Santísimo Sacramento

Fotos: C. A.G.

Infogauda / A Guarda

 O municipio guardés prepárase dende hai semanas para vivir unha das súas festividades máis destacadas, coa elaboración das tradicionais alfombras floráis que cubrirán as principais rúas do casco antigo da vila na fin de semana do Corpus Christi. Decenas guardesas e guardeses traballan arreo estes días para ultimar os preparativos, que comezarán a tomar forma durante a tarde e a noite do sábado.  

Grupo de mulleres traballando no debullado da materia prima necesaria para poder facer os tapices florais

 A veciñanza e os visitantes poderán gozar dos coloridos tapices xa na mañá do domingo, tras toda unha noite de traballo. Estes poderán contemplarse na Praza do Reló, a praza Ignacio Sobrino, a praza José María Lomba e  as rúas Oliva, Hernán Cortés, Malteses e Concepción Arenal, así como na zona da Ribeira. A contorna desta rúas permanecerá pechada ao tráfico ata o remate da tradicional procesión, que partirá dende a Igrexa parroquial de Santa María unha vez rematada a misa (12:30 h).   

Últimos días de «Tapearte» 

 A sexta edición da ruta gastronómica «Tapearte» chegará ao seu fin esta fin de semana, coincidindo coa celebración da festividade do Santísimo. Con máis de 2.800 tapas xa servidas, os 19 bares e restaurantes participantes prepráranse para acoller a partir de mañá aos «ruteiros» e as «ruteiras» máis rezagadas, que poderán gozar dunha variada oferta de tapas a un prezo único de 2€ durante o mediodía e a tardiña deste venres, sábado e domingo.  

 Os comensais dispoñen dun pasaporte no que, ademais de atopar a información detallada sobre cada unha das tapas, poderán selar aquelas que xa teñan degustado e participar no sorteo dun teléfono intelixente Samsung Galaxy 7J. Para isto, será preciso depositar os pasaportes cun mínimo de 6 selosnas urnas disponibles en cada un dos establecementos participantes e na Oficina de Turismo do Concello da Guarda. Ademais, aquelas persoas que reúnan un mínimo de 10 selos, recibirán como agasallo directo un lote de viño Pazo de Seoane, da Adega Lagar de Fornelos (O Rosal).