PONTEVEDRA

A DEPUTACIÓN DE PONTEVEDRA REORDENA A CONSERVACIÓN E MANTEMENTO DAS ESTRADAS PROVINCIAIS  

O BOPPO publica hoxe a licitación para garantir o correcto estado da rede viaria provincial cun orzamento total de 20.711.149 euros para os vindeiros catro anos 

O novo contrato permitirá agrupar en tres zonas as obras e servizos que xa se adxudicaban externamente ata agora e traballar de xeito máis eficiente con menos recursos 

No novo contrato tamén se inclúe a sinalización horizontal e vertical nas estradas provinciais

Fotos: D. P.

Infogauda / Pontevedra

 A Deputación de Pontevedra publica hoxe no Boletín Oficial da Provincia o anuncio da licitación do novo contrato para reordenar a conservación e mantemento dos 1.700 quilómetros de estradas provinciais. Segundo explica o deputado de Mobilidade Uxío Benítez, este contrato permitirá agrupar por zonas as adxudicacións de obras, servizos, sinalización e subministro de materiais que xa se adxudicaban ata o de agora externamente para completar as actuacións das brigadas provinciais, co fin de traballar de xeito máis planificado e eficiente con menos recursos. 

 O novo contrato de conservación ten un orzamento inicial de 20.711.149,63 euros e un prazo de catro anos (3.915.701 euros por exercicio). As empresas interesadas poderán presentar as súas ofertas ata o 20 de decembro e a intención é que se poña en marcha o máis rápido posible ao longo do 2018.  

 Ata o de agora, a Deputación viña traballando no mantemento das estradas tanto co persoal e medios propios, como a través de múltiples adxudicacións para facer muros, drenaxes e gabias, cubrir servizos (rozas), para a sinalización horizontal e vertical, e para comprar material, cun gasto total de media de 5,3 millóns de euros por ano. A pesares da alta contía, eses traballos non estaban ben dimensionados con respecto ás necesidades, non eran operativos, e non permitían planificar a dotación e conservación a medio prazo. 

Maquinaria traballando nunha estrada provincial

 Co cambio de modelo a principal novidade será a división en tres áreas de mantemento (Norte-Centro-Sur)que estarán a cargo dun enxeñeiro da Deputación por zona. Este funcionario terá á súa disposición aos traballadores das brigadas provinciais e os correspondentes parques de maquinaria como ata o de  agora, así como os servizos das adxudicatarias do novo contrato de mantemento. Estes inclúen dúas campañas anuais de rozas, unha de campaña limpeza e reapertura de gabias cada catro anos, e un repintado de marcas viarias cada catro anos. Tamén se contemplan operacións de atención de incidencias como a retirada e limpeza de aterramentos, saneo de noiros, estabilización con muros, execución de colectores ou drenaxes, colocación ou reparación de sinalización vertical, balizamento e sistemas de contención de vehículos, entre outras cuestións.  

 Deste xeito, reducindo a inversión en conservación ordinaria, asegura Benítez, “optimizaranse os recursos, organizarase de xeito racional a atención das necesidades do patrimonio viario, e atenderanse con máis axilidade as demandas da veciñanza, xa que non será preciso iniciar un procedemento burocrático por cada unha das obras”.  

 Áreas de traballo 

 As tres novas áreas de traballo nas que se dividirá a provincia para o mantemento de estradas (Norte, Centro e Sur) corresponderanse cos tres lotes nos que se adxudicará o novo contrato de mantemento. Segundo está establecido nas bases da licitación, por cuestións de eficacia no traballo e garantías administrativas, unha mesma empresa non poderá facerse cargo de máis dun dos lotes. 

 A zona Norte da provincia comprenderá os concellos de Lalín, Dozón, Rodeiro, Agolada, Vila de Cruces, Silleda, A Estrada, Cerdedo, Forcarei, Caldas de Reis, Cuntis, Valga, Pontecesures e Catoira. O orzamento de conservación e mantemento para estes municipios (lote 1) nos vindeiros catro anos será de 6.039.457,10 euros. 

 A zona centro da provincia englobará a Pontevedra, Vilaboa, Ponte Caldelas, A Lama, Cotobade, Barro, Poio, Cangas, Moaña, Marín, Bueu, Pazos de Borbén, Fornelos de Montes, Redondela, Soutomaior, Caldas de Reis, Portas, Moraña, Campo Lameiro, Cuntis, Cambados, O Grove, Sanxenxo, Meaño, Meis Ribadumia, Vilagarcía de Arousa e A Illa de Arousa. O orzamento para os labores de mantemento deste lote 2 será de 4.686.524,45 euros para catro anos. 

 A zona Sur da provincia comprenderá os concellos de Vigo, Nigrán, Baiona, Gondomar, Porriño, Salceda de Caselas, Mos, Pazos de Borbén, Redondela, Tui, Tomiño, Oia, O Rosal, A Guarda, Ponteareas, Salvaterra de Miño, As Neves, Mondariz, Mondariz Balneario, A Cañiza, Covelo, Arbo e Crecente. O custe de licitación deste lote 3 será de 4.936.825,36 euros para catro anos.