GALICIA

A Xunta de Galicia e os sindicatos chegan a un acordo para que os traballadores antiincendios teñan a consideración de bombeiros forestais

Arredor de 2.000 profesionais do servizo de loita contra incendios forestais da Xunta poderanse beneficiar desta medida, que suporá unha mellora das súas condicións laborais

O acordo mellora tamén as condicións dos traballadores en aspectos como a progresiva implantación dunha segunda actividade para os empregados de maior idade ou a redución da taxa de temporalidade

A conselleira do Medio Rural, Ángeles Vázquez, reuniuse esta mañá con responsables dos sindicatos representativos do Servizo de Prevención e Defensa Contra Incendios Forestais

Infogauda / Santiago de Compostela

 A conselleira do Medio Rural, Ángeles Vázquez, reuniuse esta mañá con responsables dos sindicatos representativos do Servizo de Prevención e Defensa Contra Incendios Forestais (SPDCIF) co fin de formalizar o acordo para que os traballadores antiincendios teñan a consideración de bombeiros forestais. Na xuntanza de traballo estiveron membros das centrais CIG, UGT, CC.OO. e CSI-F.

 Así, arredor de 2.000 profesionais do servizo de loita contra incendios forestais da Xunta poderanse beneficiar desta medida, que é unha petición reiterada deste colectivo. O acordo foi negociado entre os sindicatos, a propia Consellería do Medio Rural e a Dirección Xeral de Función Pública da Consellería de Facenda. O cambio suporá unha mellora das condicións laborais dos traballadores, o que redundará tamén nunha maior eficacia no desenvolvemento das súas funcións.

 Ademais desta medida, o acordo entre Xunta e sindicatos mellora tamén as condicións dos traballadores en aspectos como a progresiva implantación dunha segunda actividade para os empregados de maior idade, a redución da taxa de temporalidade ou a creación dunha comisión de seguimento do acordo.

Redución da taxa de temporalidade

 Canto á taxa de temporalidade, para reducila as partes asinantes do acordo decidiron incluír nas ofertas de emprego público dos vindeiros anos (2017 a 2020) prazas do persoal do SPDCIF, co fin de completar a convocatoria das vacantes existentes neste servizo con suxeción ao disposto na normativa básica do Estado. A Xunta comprométese a que nas ofertas de emprego público dependentes da Consellería de Facenda ofertaranse un mínimo do 20% das prazas no devandito período para este persoal.

 Con respecto á segunda actividade, as partes asinantes amósanse conscientes dos riscos laborais deste colectivo, que se acentúan coa maior idade dos seus integrantes. Por iso, acordan que o pase á segunda actividade será progresivo e estenderase á totalidade do ano como máximo no 2018.

 Esta segunda actividade será, en todo caso, voluntaria, e consistirá na realización de tarefas preventivas e de apoio loxístico ao SPDCIF sen que isto comporte unha vinculación directa ás labores de extinción de incendios. Para acceder a esta modalidade os empregados deberán cumprir varios requisitos, entre eles o de ter cumpridos 60 anos de idade e non estar acollidos á xubilación parcial.