CLAUSURA DO CURSO “SEMENTA O TEU FUTURO: DINAMIZACIÓN DE EMPREGO” E PRESENTACIÓN DE NOVOS PROXECTOS
Vista parcial da aula onde tivo lugar a clausura do curso
Infogauda / A Guarda
“As miñas expectativas eran altas, é a verdade é que se
superaron”. Con esta frase, Estela Fernández, unha das alumnas do curso “Sementa o teu futuro: dinamización de
emprego” resumía o que para ela fora este mes de formación.
A valoración final de todo as persoas que formaron parte
deste curso, tanto alumnos coma mestres, organizado pola OMIX do Concello da
Guarda, é moi positiva. O obxectivo marcado para esta formación era mostrar e
ensinar ó alumnado novas maneiras de buscar traballo, quitarlle os medos ás
posibles negativas e apoialos na creación dun novo proxecto, finalidades que se
cumpriron notablemente.
“Para min o máis útil e positivo foi a maneira na que me
axudaron a quitar o medo que eu tiña a mandar o meu currículo, por exemplo, a
un gran medio de comunicación”, afirma Bárbara Domínguez, de 23 anos licenciada
en políticas e estudante dun ciclo de Turismo e Hostalería. “O que máis me
gustou do curso é que foi unha actividade enfocada individualmente. O reforzo
persoal que nos deron foi moi positivo e entendo que a todos nos servirá para o
noso futuro”, conta Pablo Martínez, de 43 años, en paro e con estudos de
electricidade.
Continuidade nun futuro
O Concelleiro de Formación e Emprego, Javier Crespo,
visitou ós alumnos o penúltimo día de clase para, ademais de clausurar a
formación dunha maneira formal comunicarlle boas novas. Crespo, quen se mostrou
moi contento polas valoración cara o curso, afirmou que o que se busca dende o
Concello é que esta formación teña unha continuidade. “O que buscamos é tratar
de formarvos, de sementar o voso futuro e continuar axudando para que podades
concretar proxectos”, díxolles o concelleiro.
Todas estas metas, concretou, se lograrán coa segunda
fase deste proxecto. “A idea que temos é que en setembro se lle de unha
continuidade ó curso. Que podamos facer outra formación de máis duración onde
se fagan titorías individuais e de onde se poidan sacar proxectos e se
materialicen”, afirmou Crespo.
O xerme desta nova iniciativa está no grupo de persoas
que formaron parte deste primeiro curso e que serán, se eles queren, alumnos do
segundo. Nesta continuidade, na que contarán cos mesmos profesores que xa
coñecen os seus perfís e inquedanzas, o que se busca de novo é fomentar o
emprego e a inserción laboral.
“Todo isto é moi positivo. Coñecer xente e as novas
formas de buscar emprego sempre axuda”, contaba Elia Alonso, de 50 anos en
paro, tras coñecer a noticia da continuidade do curso.
María Placer Pousa, tamén alumna en paro, e de 53 anos,
afirma estar contenta mais un pouco reticente a montar un novo negocio. “Dinos
que hai moitos pros pero penso que deberían falarnos máis dos contras”, conta
Pousa.
A maioría das persoas que formaron parte deste primeiro
proxecto de dinamización para o emprego afirman estar ilusionados coa segunda
fase, unha nova iniciativa moito máis individualizada que o que buscará será
axudar nas dúbidas concretas de cada alumno ou alumna.
“Eu xa me levo moitísimas cousas deste curso, formación
que teño que madurar en casa e sacarlle todo o xugo que ten”, dicía Estela
Fernández. E continuaba, “falando co resto de compañeiros cremos que este segundo
proxecto será moi positivo para todos nós, despois do verán e despois de
madurar as nosas ideas voltaremos con máis ganas”.
O Concelleiro de Emprego e Formación afirmou que, a pesar
de que aínda quedan cousas sen rematar, o xerme do novo proxecto está e que “as
ganas” tamén.
Ningún comentario:
Publicar un comentario