O ROSAL

O BNG do Rosal votará en contra duns orzamentos municipais “encorsetados”, faltos de alternativas e porque reducen investimentos para pagar a SOGAMA

Reducen os investimentos reais para incrementar nun 33% o pago do canon a SOGAMA acordado unilateralmente, que suporá 36.000 euros máis.

Fracasa de xeito estrepitoso o plan de aforro eléctrico, di Alonso Pereira

Infogauda / O Rosal

O BNG do Rosal votará en contra da aprobación dos orzamentos municipais que propón o PP, por “encorsetados”, faltos de programas de que reducen os investimentos reais para poder pagarlle a SOGAMA o incremento da factura do lixo.

O voceiro municipal do BNG, Alberte Alonso Pereira, anunciou o voto en contra aos orzamentos para o vindeiro ano, argumentando que, pese a medrar de xeito insignificante o montante global, redúcese considerablemente a partida de investimentos reais, case na mesma cantidade que se incrementa o recibo de SOGAMA, 36.000 euros, e por falta de alternativas de desenvolvemento local.

Nese sentido di, que a proposta do que se leva ao pleno deste sábado, son continuistas, carecen dun plan de activación económica, turística, comercial, e non ofrecen alternativas e fomento do emprego

A baixada de impostos do PP é mentira

Alonso Pereira di que estes orzamentos pon de manifesto que o discurso do PP de baixar impostos é totalmente falso, pois, indica que os ingresos medran pola subida do IBI (urbana) nun 11%, do servizo de axuda no fogar nun 10% ou na repercusión indirecta da mencionada subida do recibo do lixo nun 33%.

Fracaso do plan do alcalde de baixar a factura eléctrica

Por outra banda, o voceiro nacionalista indica que, o plan do alcalde, case persoal, de baixar os gastos en enerxía eléctrica é un auténtico fracaso, pois mantense o gasto, a pesar de que deixou a media luz a totalidade dos barrios e parroquias.

En conclusión, o voceiro nacionalista indica que, son uns orzamentos claramente marcados polos “corsés” da troika comunitaria, que o goberno central segue ao ditado, impondo medidas de regras de gasto e estabilidade orzamentaria que van no camiño de eliminar a autonomía local e da capacidade de decisión dos concellos.