SALCEDA DE CASELAS

A DEPUTACIÓN ADXUDICA A CONSTRUCIÓN DUNHA SENDA PEONIL A CARÓN DO RÍO CASELAS, NO CONCELLO DE SALCEDA

·       

As obras contarán cun orzamento de 100.428 euros e serán executadas pola empresa Pérez Portela

Actuarase no treito comprendido entre Palomar de Antero e As Regadas

·       Os traballos incluirán tamén a recuperación dun camiño rural desde As Regadas ata a estrada municipal

Converter unha zona en estado de abandono nun espazo para uso recreativo e poñer en valor unha área de alto valor ambiental como é o contorno do río Caselas é o obxectivo das obras que a Deputación provincial de Pontevedra vén de adxudicar á empresa Pérez Portela, por un importe de 100.428,08 euros.

Os traballos consistirán na creación dunha senda peonil na marxe dereita do río –augas abaixo- ao seu paso pola parroquia de Salceda, no concello de Salceda de Caselas. A senda constará dun ancho de 2 metros e unha lonxitude de 815 metros, partindo do Palomar de Antero e estendéndose ata As Regadas.

A senda estará afirmada con zahorra natural compactada e delimitada mediante marxes de pedra. Para corrixir os desniveis que nalgúns puntos do paseo existen, procederase á construción de ramplas de madeira asentadas sobre muros de pedra, mentres que para salvar as sangras de desaugue que de forma natural verten ao Caselas, construiranse dous pontillóns de madeira cos seus conseguintes valados de protección, tamén en madeira.

Camiño rural

Para mellorar a comunicación desta senda, os traballos incluirán a recuperación do camiño rural de As Regadas, mediante labores de acondicionamento do terreo e dos muros que delimitan o camiño, que se dotará dunha capa de zahorra natural.

No linde do camiño coa senda peonil colocaranse tubaxes de drenaxe para evitar pozas en época de choivas. Ademais, construirase un paso de adoquíns para cruzar a estrada que desde Salceda de Caselas conduce ata o barrio de Paxariñas.

O obxectivo é aproveitar o contorno privilexiado do río Caselas para uso e disfrute de veciños e visitantes.