PONTEVEDRA

RAJOY AFIRMA QUE O DE PONTEVEDRA É “O MELLOR MUSEO PROVINCIAL DE ESPAÑA” E DESTACA O SEU COMPROMISO Ó LONGO DO TEMPO CON ESTAS INSTALACIÓNS QUE “SON UN EXEMPLO DO QUE SE PODE FACER TRABALLANDO XUNTOS”

· Louzán destaca que con esta ampliación o Museo convértese “xa é para sempre, nun dos máis senlleiros e queridos iconos da nosa cidade e de Galicia”.

O presidente do Goberno de España, Mariano Rajoy, presidiu hoxe a inauguración oficial do sexto edificio do Museo de Pontevedra, acompañado polo presidente da Xunta de Galicia, Alberto Núñez Feijóo, polo titular da Deputación Provincial de Pontevedra, Rafael Louzán Abal; e por unha nutrida representación da política e da vida social e cultural pontevedresa.

Entre os asistentes atopábanse a presidenta do Parlamento, Pilar Rojo; o delegado do Goberno en Galicia, Samuel Juárez; o vicepresidente e conselleiro de Presidencia, Administracións Públicas e Xustiza, Alfonso Rueda; o conselleiro de Educación, Jesús Vázquez, entre outras autoridades autonómicas, representantes do Goberno  provincial e do Concello de Pontevedra; alcaldes da provincia e representantes da vida cultural como, por exemplo, o pintor Manuel Aramburu.

Ante este amplo auditorio, Rajoy cualificou ao Museo de Pontevedra como “o mellor Museo Provincial de España”, e convidou non só aos presentes no acto, senón a todos os galegos e españois, a visitalo.

O Museo, un exemplo de administración eficaz e cercana

Na súa intervención, agradeceu a oportunidade que lle deu a Deputación de “prestar o meu apoio á rica tradición cultural de Galicia”, así como os esforzos que realizan desde a administración provincial por “conservar e difundir” este inxente patrimonio. Mariano Rajoy recordou a súa etapa como presidente da Deputación, na que formou parte do Padroado do Museo, que visitou en diversas ocasións nos últimos anos e que, asegurou, “seguirei visitando”.

Por todo isto o titular do Goberno en España amosou a súa “satisfacción e orgullo” pola labor desta institución para “conservar o legado que nos deixaron as xeracións que nos precederon, amplialo e difundilo, o cal é unha nobre responsabilidade que a Deputación e os cidadáns realizan con orgullo e eficacia”.

De seguido, Rajoy  destacou que este Museo “é un exemplo de administración eficaz e próxima, característica das deputacións, así como do apoio de institucións privadas en beneficio da sociedade”.

Puxo de relevo, neste senso, a labor de mecenado dos benfeitores privados e, destacou o seu "compromiso ao largo do tempo" con estas instalacións, incidindo en que "en momentos de dificultades como os actuais, [o Museo] é un exemplo do que podemos facer traballando todos unidos e camiñando cara un obxectivo común”.

Finalmente, Mariano Rajoy salientou que "a cultura é unha necesidad, algo propio das sociedades modernas, un símbolo da nosa identidade, o espíritu do que fomos e seremos capaces de construír". Neste sentido, loou o carácter "aberto e integrador" da pluralidade cultural de España, "que serve para unir e para achegar e non para ser utilizado para dividir, confrontar ou separar".

Sinatura no libro de Ouro da Deputación

Tras a súa intervención, Mariano Rajoy descubriu a placa conmemorativa do acto e, de seguido, asinou no Libro de Ouro da Deputación onde plasmou as seguintes verbas «A mis amigos de la Diputación de Pontevedra. Mi casa esta 1983-1986 con todo mi cariño. Aquí viví una parte muy bonita y muy importante de mi vida. Mucha suerte. Buen futuro».

Posteriormente, e sempre acompañado polo xefe do executivo autonómico e polo presidente da Deputación, entre outras autoridades, realizou unha visita ás instalacións do Sexto Edificio do Museo, percorrendo as 23 salas de exposicións permanentes que a partires de hoxe quedarán abertas ó público.

Transformación do Museo de Pontevedra

As obras inauguradas son froito dun convenio asinado no ano 2000 por Mariano Rajoy na súa como ministro de Educación, Cultura e Deporte, coa  Xunta e a Deputación, tal e como destacou o presidente da Deputación, Rafael Louzán, na apertura do acto de inauguración.

Louzán agradeceu a labor de Mariano Rajoy que, dixo,  “é o gran responsable, a man invisible e sempre discreta que posibilitou a esplendorosa transformación do Novo Museo de Pontevedra e da cidade toda. Foi quén, na súa etapa de Ministro de Educación e Cultura, de conseguir os fondos para ampliar o Museo”.

Un Museo, dixo, que con esta ampliación “se converte, xa é para sempre, nun dos máis senlleiros e queridos iconos da nosa cidade e de Galicia”.

Louzán manifestou a súa confianza de que, ao igual que hoxe se ven os froitos do compromiso amosado por Rajoy co Museo, os resultados dos seus  traballos e responsabilidades doutro tempo, “sexa un anticipo da súa xestión ó fronte do Goberno de España”, incidindo en que, tal e como dicía o escritor suizo Durrenmätt “non importa onde estamos, senón a dirección na que nos movemos”.

Con estas declaracións, quixo referendar a actuación do presidente do Goberno e o seu empeño e tesón na defensa dos intereses do país, porque, segundo dixo,  “as grandes cousas non adoitan xurdir da improvisación, senón do traballo sereno, rigoroso e constante, moitas veces incomprendido e sempre planificado a medio ou a longo prazo”, algo que caracteriza o que denominou “estilo Rajoy”.

Un estilo marcado polo “traballo arduo, calado, sen curtopracismos e sen buscar o aplauso fácil e instantáneo, con altura de miras e con resultados palpables” como os que se demostran no Novo Edifico do Museo inaugurado hoxe ou na transformación da Cidade Histórica a través do Plan Urban.

O responsable provincial, que non quixo esquecerse das “persoas que están sufrindo problemas" e coas que tanto o Goberno central como autonómico traballan por atopar solucións, destacou tamén a colaboración da  Xunta de Galicia e do seu presidente, Alberto Núñez Feijoo, “apoiando nas súas diferentes responsabilidades, esta cidade e a construción deste Museo, que sempre apoiou económica e culturalmente e tamén  coa súa presenza  sempre que se lle requiriu”.

Pola súa  banda, Alberto Núñez Feijóo salientou na súa intervención o valor e o poder da cultura na conformación e mantemento da identidade, asegurando que "cando non había institución, cando non existían estruturas políticas nin económicas, Galicia atopou protección e esperanza, na cultura", lembrando que foi en 1963 cando se puxo en marcha, en honor á Rosalía de Castro, o Día das Letras Galegas.

Cincuenta anos despois, dixo, “é este novo espazo museístico o que nos volve recordar que Galicia é un gran país, capaz de levantarse e seguir camiñando". Alberto Núñez avogou por unha política de portas abertas nas institucións culturais galegas, xa que os seus fondos son "símbolos de onte e de hoxe" dos que "xermola sempre unha cultura para o entendemento, que non é de ninguén senón de todos, que non pecha senón que abre, que non establece valados senón que abre camiños”.

Obras trascendentes custodiadas polo Museo ven a luz por primeira vez

Con esta ampliación, o Museo segue medrando de forma imparable non só porque incrementa considerablemente o espazo expositivo, senón tamén  porque consegue sacar á luz creacións artísticas de gran valor que ata o de agora permanecían veladas ó ollo do visitante.

A Deputación, pon a disposición da cidadanía un edificio de 10.000 m2 integrado por un auditorio, talleres de restauración, espazos para exhibicións temporais e 23 novas salas nas de exposicións permanentes. A  apertura destas novas salas constitúe un dos fitos máis importantes  deste proxecto  porque suman á colección permanente arredor de 700 obras, incluídas algunhas nunca expostas ata agora.

O percorrido desta colección amplíase en máis de 4.000 m2 nos que se poderán visitar xoias imprescindibles da Arte Galega, dende a Baixa Idade Media ata a actualidade, así como as de Arte Español, dende o entorno de Goya ata o século XX; tamén restos arquitectónicos; un espazo dedicado ó violinista Manuel Quiroga;  e como non podía ser doutro xeito, a mellor colección do Mundo de obras de Castelao que custodia o Museo de Pontevedra que se completa co gran tríptico de cegos cedido pola RAG.

 O retablo de Belvís, a única pintura sobre táboa  do Medievo en Galicia; o tímpano do convento de San Francisco; obras de Sorolla e de autores impulsados polas becas da  Deputación (Souto, Maside, Torres, Laxeiro) son algunhas das obras de arte que se poderán visitar de forma permanente no sexto edificio do Museo.

A todo isto, sumarase a diversa programación que se xa se ven desenvolvendo na sala de exposicións temporais que quixemos facer coincidir nestas datas cunha retrospectiva do artista local Manuel Aramburu «Da Infancia á Madurez».

Finalmente, compre recordar que a Deputación de Pontevedra organizará con motivo desta exposición unha xornada de portas abertas para visitar o edificio. Terá lugar o hoxe 4 de xaneiro de 17 a 21 horas; e os días 5, 6 e 7 de xaneiro en horario de 11 a 14 horas e de 17 a 21 horas.