A GUARDA

A ASOCIACIÓN NATURALISTA "BAIXO MIÑO" (ANABAM) PREPARA UNHA EXPOSICIÓN RELACIONADA COAS MARCAS DOS MARIÑEIROS DE A GUARDA

ANABAM / A Guarda

Dende ANABAM estamos a ver que moitos mariñeiros que usaban marcas nos seus aparellos, hoxe xa non as recordan, perdéndose deste xeito, unha grande oportunidade para tratar de poñer ao día a memoria, cos máis amplos detalles, dunha forma de vida e de traballo totalmente artesanal, que se desenvolvía ata ben entrados os anos sesenta. As marcas que utilizaban os mariñeiros nos achegan ao coñecemento mesmo das xentes que as utilizaban así como das artes que empregaban. En ANABAM conservamos algún material, sobre todo ducias de cortizas, coas marcas orixinais daqueles mariñeiros que ían ao mar en condicións moi diferentes ás de hoxe. Material, por outra parte, que foi doado polos propios mariñeiros, polas súas familias ou, mesmo, recollido directamente do lixo.

    O interese que dende hai 30 anos tomamos nesta asociación co mundo do mar, leva a que continuemos con este tema. Por elo, e co fin de organizar no vindeiro Nadal unha exposición relacionada coas marcas dos mariñeiros da Guarda, ANABAM impulsa novamente a recollida de marcas coas que levar a cabo a citada exposición, editar máis adiante unha nova publicación e  ampliar o número de marcas que xa temos.

     Por isto, agradecemos a tódalas persoas, principalmente aos mariñeiros guardeses, toda a información posible que nos poidan dar e que contribuirán, deste xeito, a evitar a perda irreparábel deste patrimonio etnográfico local.

   As persoas que queiran dar información sobre as marcas, poden achegarse ao local de ANABAM, na Guarda (rúa Calvario, 44-baixo) polas tardes, onde temos dispoñibles unhas fichas para recoller todo o relacionado coas marcas.