GONDOMAR

LOUZÁN E GUITIÁN INAUGURAN A ROTONDA E AS BEIRARRÚAS DE SAN BIEITO E EMIGRANTE NAS QUE A DEPUTACIÓN INVESTÍU 122.000 EUROS

O presidente da Deputación, Rafael Louzán, o conselleiro de Medio Ambiente e Infraestruturas, Agustín Hernández, e o alcalde de Gondomar, Fernando Guitián, inauguraron esta tarde a obra de construción dunha rotonda e das beirarrúas nas estradas San Bieito e Emigrante.

Esta actuación foi acometida con cargo a fondos do Plan de Investimentos da Deputación e supuxo, en concreto, unha inversión de 122.000 euros. A obra foi executada pola empresa Construcións Obras e Viais, COVSA.

Os traballos consistiron na construción de beirarrúas, excepto en fronte á gasolineira; no fresado da plataforma antiga e posterior pavimentación da rúa San Bieito; na renovación dos colectores de augas fecais e instalación dun solo colector de augas pluviais pola marxe dereita e na sinalización vertical e horizontal.

Ademais acometéronse outras accións como a modificación das dimensións das arquetas e dos diámetros das tuberías a petición das compañías en relación coa instalación de baixa tensión.

O presidente da Deputación amosou a súa satisfacción pola realización desta obra e puxo de relevo que “a mellora destas rúas beneficiará as comunicacións do municipio e a construción da rotonda contribuirá á reordenación do tráfico”.