SE LICHINGA COÑECEU TEIS...
Manuel Ángel Pombal Diego / Pedornes
Presentamos este mes no Centro
Cultural de Pedornes unha interesantísima exposición fotográfica da autoría de
Suso Iglesias, veciño de Teis (concello de Vigo), despois de vivir (e convivir)
coas súas xentes durante un ano en Lichinga (Mozambique).
A Exposición
A exposición está conformada por 56 fotografías de 22×15 e 7 fotografías de
45×30 que se presentan montadas en varios formatos (1,
2 ou 4 xuntas), e, a súa vez, organizadas baixo sete temáticas diferentes elixidas
polo autor: “Camiños”, “Dia da Muller Mozambicana”, “Traballos”, “Momentos de
descanso”, “Paseos”, “Crianças” e “Animais”. Outro aspecto salientable da
exposición é que cada temática vai acompañada dun caderno no que se amosa un
pequeno esquema das fotos que inclúe, xunto coa súa distribución e unha pequena
explicación que facilita a contextualización e interpretación de cada unha
delas; por outra banda, indícase a data na que foi realizada (mes e ano), así
como unha pequena historia arredor de cada unha das temáticas que se abordan, a
modo de resumo das anotacións de Suso nos seus cadernos de viaxe. En
definitiva, un pedazo da vida real dos habitantes de Lichinga, vida e costumes,
e os seus arredores, engadindo comparacións coas súas lembranzas de Teis. Aínda
que se amosan dúas realidades ben distintas, no fondo hai moitas semellanzas xa
que os seres humanos somos e sentimos do mesmo xeito con independencia da
realidade na que nos toque vivir. Finalmente, compre sinalar que cada un dos cadernos
ten un bolígrafo (ambos de papel reciclado), para que cada quen poida deixar comentarios,
críticas, impresións,. .., ou sinxelamente reflectir os sentimentos transmitidos
tanto polas fotografías como polos textos que as acompañan.
A exposición pode visitarse os días 3,
10, 17 e 24 de Xuño, e 1 de Xullo de 16.00 a 22.30 h no Centro Cultural de
Pedornes, xusto a carón do terreiro das festas.
O Autor
Esta impresionante exposición
fotográfica foi realizada por Suso Iglesias. Suso pasou un ano (de decembro de
2008 a decembro de 2009) desenvolvendo funcións como técnico nun proxecto de
cooperación para o desenvolvemento da acuicultura (proxecto dirixido pola
Fundación CETMAR), na provincia de Niassa (Mozambique). Nese ano viviu en
Lichinga (capital de Niassa), convivindo coas súas xentes, e “vivindo
experiencias que me marcaron e que mudaron moitas cousas en min”, segundo el
mesmo conta. Unha vez de volta en Vigo, naceu un pequeno gran soño na súa
cachola matinando sobre as intensas experiencias vividas en Lichinga, onde
tamén tivo tempo de falar coa xente e lembrar (e contar) moitas cousas
relacionadas coa súa nenez no barrio de Teis (Vigo); xa que, dalgunha maneira,
Lichinga coñeceu parte da realidade de Teis a través das súas historias, tamén
Teis podía coñecer Lichinga. Así comezou o xerme que deu lugar á exposición que
se presenta (e de aí o seu título), e que comezou o seu percorrido no seu
propio barrio (Centro Cívico de Teis) o pasado mes de maio. Agora temos unha
oportunidade inmellorable para coñecer Lichinga no Centro Cultural de Pedornes,
grazas a Suso e ás Asociacións de Veciños e Cultural da citada parroquia.
Suso tamén pon a disposición dos
visitantes o seu enderezo electrónico por se alguén está interesado nalgunha
fotografía ou ben en saber mais sobre a súa experiencia nas terras do norte de
Mozambique.
Ningún comentario:
Publicar un comentario