Pais e nais, estudantes e
docentes pecháronse no IES A Sangriña da Guarda en protesta contra os recortes
no ensino público
Pais e nais, estudantes e docentes iniciaron esta tarde,
ás catro, no Instituto de Educación Secundaria da Sangriña na Guarda. O peche foi promovido pola Plataforma
Galega en Defensa do Ensino Público e terá continuidade noutros centros
educativos.
Marta Dacosta,
portavoz da CIG-Ensino no Baixo Miño, sinalou que este peche forma parte dun
calendario de mobilizacións co que a Plataforma Galega en Defensa do Ensino
Público esixe da Consellaría de Educación que non aplique en Galiza ningún dos
recortes que recolle RD Lei 14/2012 e que o recorra por invadir as competencias
que en materia educativa ten a Xunta de Galiza. Ademais lembrou que a
Plataforma Galega convoca a toda a comunidade educativa a participar na
manifestación que se celebrará este domingo 3 de xuño en Compostela, para
reclamar que non se produzan máis recortes en educación
Entre as nais, Ana
Bermejo, expresou “a preocupación de que os recortes condicionen o futuro
académico dos nenos e nenas, pois van prexudicar fundamentalmente ás persoas
con menos recursos que verán condicionado o seu futuro académico aos seus
recursos económicos, e que isto limite o desenvolvemento das súas capacidades.”
Andrea Araújo,
alumna do IES da Sangriña, denunciou que “estas medidas van supoñer a masificación
das aulas e que isto implica que, por exemplo, o profesor ou profesora non teña
tempo suficiente para atender a todas esas dúbidas”
O peche rematará ás
oito da mañá do xoves 31 e terá continuidade cun novo encerro da comunidade
educativa, ese mesmo día ás 16:00 horas no IES Alfredo Brañas de Carballo. Os
peches finalizarán o 31 de maio en Ourense.
A Plataforma Galega
en Defensa do Ensino Público rexeita os recortes propostos, denuncia que con
eles se ataca gravemente o ensino público e a súa calidade, así como o dereito
de igualdade de oportunidades do alumnado, que aumentará o fracaso escolar e
despedirá máis de 2000 profesores/as. Por
todo isto, esixe que o Goberno galego actúe como tal e non se someta a
decisións que van en contra do ensino galego, que se negue, rotunda e
publicamente, a aplicar calquera das medidas contidas no RD Lei 14/2012 e que
presente recurso por invasión de competencias.
Por todos estes
motivos chama tamén á manifestación que
terá lugar o día 3 de xuño en Compostela, con saída ás 12:00 da Alameda.
Ningún comentario:
Publicar un comentario