Música e Palabras regresa á Casa de Montes de Camposancos cunha nova cita coa cultura e a emoción
• Este venres, ás oito da tarde. Unha oportunidade para compartir sentimentos, espertar emocións e deixar voar a palabra ao compás da música.
Ricardo Rodríguez Vicente/Camposancos
A palabra, a música e os sentimentos volverán darse a man este venres, 6 de novembro, ás 20:00 horas, na Casa de Montes de Camposancos, cunha nova edición de Música e Palabras, unha iniciativa cultural que convida a compartir a sensibilidade artística e o pracer de expresarse a través da literatura e da música.
O encontro está organizado pola Comunidade de Montes Veciñais en Man Común de Camposancos e a Asociación Rego de Bicosán, entidades que, unha vez máis, abren as portas á participación de todas aquelas persoas que desexen achegar a súa voz, a súa creatividade e o seu talento. Así, quen o queira poderá recitar poemas propios ou doutros autores, ler algún fragmento dunha obra literaria, interpretar unha peza musical con calquera instrumento ou participar a través doutras manifestacións artísticas.
A sesión contará tamén, unha vez máis, coa presenza da cantautora María José Baz Martínez, que ofrecerá ao público a súa voz e as notas da súa guitarra, nunha intervención que promete engadir sensibilidade e calidez a esta celebración da cultura compartida.
Esta nova convocatoria chega, ademais, nun tempo especialmente propicio para a reflexión e a lembranza. Son días nos que o pensamento se dirixe con especial agarimo cara ás persoas que nos precederon na vida, ás que xa non están fisicamente entre nós, pero que permanecen vivas na memoria, nos sentimentos e nas pegadas que deixaron nos nosos camiños. Por iso, o encontro terá tamén un espazo íntimo e respectuoso para esa memoria colectiva e persoal que nos acompaña.
Música e Palabras pretende ser, en definitiva, moito máis ca unha sucesión de intervencións artísticas: un espazo de convivencia, encontro e participación, no que cada poema, cada lectura, cada canción e cada nota musical contribúan a construír unha experiencia colectiva.
A organización anima a veciñanza e a todas as persoas interesadas a achegarse á Casa de Montes de Camposancos e participar activamente nesta nova edición. Porque a cultura tamén se constrúe compartindo, escoitando e dando voz aos sentimentos.
Ningún comentario:
Publicar un comentario