CABO DA CRUZ (BOIRO)

A Asociación Gamela celebra o seu 25 aniversario coas «Xornadas de Esperanza e Liberdade» no Cabo da Cruz 

• A programación desenvolverase os días 13 e 14 de novembro no Centro Social da localidade. 

• O programa inclúe proxeccións, coloquios e un espazo dedicado á memoria colectiva e á identidade mariñeira. 

Infogauda/Cabo da Cruz (Boiro) A Coruña

 A Asociación Cultural e de Tradicións Mariñeiras Gamela conmemora este ano o seu 25 aniversario (2001-2026) coa organización das «Xornadas de Esperanza e Liberdade». Esta iniciativa nace co obxectivo de celebrar o cuarto de século de traxectoria da entidade e poñer en valor a cultura, as tradicións e a memoria vinculadas ao mar.

 Cun programa centrado no patrimonio inmaterial e no traballo colectivo, Gamela busca reivindicar a identidade mariñeira do Cabo da Cruz e transmitir este legado ás novas xeracións. As actividades terán lugar no Centro Social do Cabo da Cruz ao longo de dúas xornadas con acceso aberto para toda a veciñanza. 

Programa das xornadas 

 As actividades arrancarán o venres 13 de novembro ás 19:30 horas coa proxección do documental A Campaña do Argus. Ao remate da peza audiovisual, celebrarase un coloquio no que as persoas asistentes poderán compartir reflexións, historias e experiencias arredor do contido do filme.

 O sábado 14 de novembro, a xornada comezará ás 10:00 horas coa recepción e chegada dos participantes. Ao longo de toda a mañá sucederanse diferentes propostas culturais, entre as que destacan: 

• «Mar feito palabra»: unha aproximación ao patrimonio oral e cultural. 

• Proxección dos 25 anos da asociación: un percorrido visual pola historia e os fitos acadados por Gamela desde a súa fundación en 2001. 

• «Esperanza e Liberdade. Conversas na memoria»: un espazo de encontro concibido para o intercambio de lembranzas, vivencias e testemuñas directas ligadas á tradición do mar. 

 Desde a organización fan un chamamento á participación activa da veciñanza, do sector do mar e de calquera persoa interesada en salvagardar a memoria colectiva. Coa difusión deste evento, a asociación agarda que esta celebración especial sexa un punto de encontro e recoñecemento para toda a comunidade do Cabo da Cruz.