O ROSAL

O Rosal prepárase para unha gran noite polifónica co 22º aniversario da súa coral 

•   O Auditorio Municipal do Rosal acollerá este sábado un encontro musical de excepción que reunirá as voces da formación anfitrioa, a Coral Polifónica Estradense e a Coral Beato Sebastián Aparicio da Gudiña.

Ricardo Rodríguez Vicemnte/O Rosal

  A Axenda cultural do Baixo Miño ten este sábado, 24 de outubro, unha cita imprescindible coa música vocal. A Coral da Agrupación Musical do Rosal celebra as súas máis de dúas décadas de traxectoria por todo o alto, organizando un concerto especial para conmemorar o seu 22º aniversario. A cita musical arrancará ás 20:00 horas no Auditorio Municipal cun formato de encontro que promete emocionar a toda a veciñanza.

 Para unha ocasión tan sinalada, a formación anfitrioa non estará soa no escenario. O concerto contará coa participación de dúas prestixiosas agrupacións convidadas doutros puntos da xeografía galega: a Coral Polifónica Estradense e a Coral Beato Sebastián Aparicio, que viaxa desde A Gudiña. Esta combinación de estilos e procedencias garante un repertorio variado, cheo de matices, fermosas voces e algunha que outra sorpresa musical preparada especialmente para a velada.

 Desde a organización destacan que este aniversario non é só unha cifra, senón un recoñecemento ao esforzo, á ilusión e ao traballo colectivo que mantivo viva a música coral no municipio durante 22 anos. Por iso, fan un chamamento a toda a comarca para unirse a esta celebración compartida, onde a entrada será totalmente de balde ata completar o aforo. Unha oportunidade perfecta para cantar, sentir e poñer en valor o talento da nosa terra neste outono musical.