O ROSAL

O Coro Infanto-Xuvenil da Agrupación Musical do Rosal presenta  o seu novo videoclip, «Quen é a que canta» 

•  Este sábado, 17 de outubro, ás 20:00 horas, no Auditorio do Rosal

Infogauda/O Rosal

 Despois da boa acollida do ano pasado coa presentación do seu primeiro videoclip, o Coro Infanto-Xuvenil da Agrupación Musical do Rosal tiña moitas ganas de volver propoñer un proxecto destas características. Así nace «Quen é a que canta», o novo videoclip que se presentará este sábado, 17 de outubro, ás 20:00 horas, no Auditorio do Rosal.  

 A peza toma como referencia a canción de Tanxugueiras e Fillas de Cassandra, con arranxos de Andrés Álvarez e dirección artística de Toñi Santos, directora do coro.  

 A canción pon o foco na identidade, na voz propia e no papel das mulleres, reivindicando a liberdade de ser e expresarse sen ter que encaixar nos moldes impostos. A través dunha sonoridade que conecta a tradición coa actualidade, convértese nunha invitación a cuestionar os estereotipos e a celebrar a forza de atopar a propia voz.  

 Con este novo proxecto, o Coro Infanto-Xuvenil da Agrupación Musical do Rosal continúa apostando por propostas que combinan música, creatividade e participación da mocidade, ofrecendo ao seu alumnado novas oportunidades para explorar outras formas de expresión musical e artística.  

 A presentación permitirá compartir co público o traballo realizado polo coro e descubrir o resultado desta produción audiovisual, froito da ilusión e da implicación de todas as persoas participantes.  

 Desde a Agrupación Musical do Rosal anímase a toda a mocidade a sumarse a este proxecto, participar nas actividades do coro e descubrir todo o que a música pode ofrecer como espazo de encontro, aprendizaxe e expresión colectiva.  

 A Agrupación Musical do Rosal convida tamén a toda a veciñanza a acompañar o coro nesta estrea, o sábado 17 de outubro, ás 20:00 horas, no Auditorio do Rosal.