A GUARDA

A GUARDA SÚMASE Á IX EDICIÓN DO CICLO NACIONAL DE CINE Y MUJERES RURALES CON DÚAS PROXECCIÓNS 

• O Concello da Guarda participa nesta iniciativa impulsada polo Ministerio de Agricultura, Pesca e Alimentación con dúas sesións cinematográficas os días 23 de outubro e 13 de novembro no Centro Cultural 

Infogauda/A Guarda

 O Concello da Guarda súmase á IX edición do Ciclo Nacional de Cine y Mujeres Rurales, unha iniciativa impulsada polo Ministerio de Agricultura, Pesca e Alimentación que busca dar visibilidade ao papel das mulleres no medio rural a través do cine e achegar ao público historias que amosan diferentes realidades, experiencias e perspectivas.  

 No marco desta iniciativa, o Centro Cultural da Guarda acollerá dúas proxeccións, ambas ás 20:30 horas:  

• Venres, 23 de outubro: Bodegón con fantasmas, dirixida por Enrique Buleo. 

• Venres, 13 de novembro: La buena letra, dirixida por Celia Rico.  

 As dúas sesións forman parte da programación presencial desta novena edición, que se desenvolve entre o 15 de outubro e o 15 de novembro en localidades de todo o territorio estatal.  

 Ademais das proxeccións presenciais, o ciclo ofrece unha mostra en liña gratuíta, dispoñible a través da súa páxina web oficial entre o 17 e o 31 de outubro. Esta programación reúne unha selección de 13 longametraxes e curtametraxes relacionadas coas mulleres e o mundo rural.  

 Con esta participación, A Guarda incorpora á súa programación cultural unha iniciativa que combina cine e reflexión social, favorecendo o coñecemento doutras realidades e o recoñecemento da contribución das mulleres á vida e ao desenvolvemento do medio rural.