VIGO/PONTEVEDRA

A comunidade educativa galega volverá ás rúas este mércores 6 en defensa do ensino público 

Infogauda/Vigo/Pontevedra

 A CIG-Ensino chama á mobilización da comunidade educativa en defensa do ensino público este mércores 6 de maio pola tarde para reclamar un ensino público galego con máis medios, máis profesorado e mellores condicións nos centros.  

 Este mércores, 6 de maio ás 19:00 horas, terán lugar máis de 20 mobilizacións simultáneas ao longo de todo o territorio galego, incluíndo distintas localidades das comarcas de Vigo e de Pontevedra.  

 Esta convocatoria enmárcase nun contexto de crecente conflito educativo en Galiza, con múltiples xornadas de folga e mobilizacións impulsadas polo profesorado ante a falta de resposta real da Consellaría de Educación. Nos últimos meses, o colectivo docente vén denunciando unha situación insostíbel marcada pola sobrecarga de traballo, a falta de persoal e o deterioro progresivo das condicións de ensino.  

 Ademais, a comunidade educativa denuncia o abandono das infraestruturas e a falta de investimentos reais, así como unha aposta clara pola privatización e concertación en detrimento do ensino público.  

 Desde a CIG-Ensino Vigo sinalan que "non estamos ante problemas puntuais, senón ante un modelo que debilita o ensino público e precariza o traballo docente", e lembran que a baixada demográfica debería servir para mellorar a atención educativa e non para recortar recursos.  

 A mobilización forma parte dunha resposta colectiva en todo o país, con protestas convocadas en múltiples localidades galegas, nunha xornada na que a comunidade educativa sae á rúa para dicir alto e claro que o ensino público non se vende, deféndese.   

Principais reivindicacións  

• Redución real das ratios en todas as etapas educativas 

• Incremento do profesorado e do persoal de atención á diversidade 

• Recuperación das condicións laborais previas aos recortes 

• Redución da carga burocrática 

• Mellora e investimento nas infraestruturas dos centros  

 Desde a CIG-Ensino fan un chamamento á participación masiva para "encher as rúas de dignidade e defender un dereito básico como é a educación pública"  

Mobilizacións convocadas nas comarcas de Vigo e Pontevedra  

A Estrada 

19:00 h Praza do Mercado Mos e O Porriño 

Mos

19:00 h Explanada de Queen 

O Porriño

19:00 h Praza do Concello 

O Morrazo 

19:00 h Desde a praza do Concello de Cangas 

O Salnés-O Grove 

19:30 h Desde a praza do Corgo, O Grove 

Ponteareas 

19:00 h Saída do IES Val do Tea 

Pontevedra 

19:00 h A Peregrina 

Redondela 

19:00 h Praza do Concello de Redondela 

Val Miñor 

19:00 h Capela de San Campio, Ramallosa 

Vigo 

19:00 h dende Vía Norte con Urzaiz (Vialia) até o farol de Urzaiz. 

Vila de Cruces 

19:00 h Saída do IES Marco do Camballón