DEPORTES

BALONMÁN FEMININO

O Mecalia Atlético Guardés recibe ao KH-7 BM Granollers 

• Este mércores, 3 de setembro, ás 21.00 horas, no pavillón A Sangriña 

• Será o primeiro encontro coma anfitrión desta tempada para o equipo miñoto, que buscará sumar a súa segunda vitoria trala remontada en Lanzarote o pasado sábado 

• De novo, Ana Seabra contará con tódalas xogadoras do equipo guardés 

 

Redacción Deportes / A Guarda

 O Mecalia Atlético Guardés prepárase para a súa estrea na casa. O pavillón municipal de A Sangriña acollerá este mércores, 3 de setembro, ás 21.00 horas, o seu primeiro partido da Liga Guerreras Iberdrola 2025/2026, correspondente á segunda xornada, fronte ao KH-7 BM Granollers. Unha xornada entre semana na que a afección guardesa coñecerá oficialmente ás novas incorporacións dun equipo que buscará inaugurar o ano como anfitrión cunha vitoria tan esperanzadora coma a que logrou a pasada fin de semana en Lanzarote. 

 E é que o Mecalia chega ao partido coa confianza de saberse capaz de loitar ata o final tamén esta tempada. O sábado, as de Ana Seabra superaron un encontro difícil na casa dun Zonzamas famento no seu debut na categoría, sentenciando unha impresionante remontada no derradeiro cuarto tras practicamente todo o partido a remolque do equipo canario (23-28). Un parcial de 3-11 demostrou que o cadro de persoal renovado do conxunto miñoto pode coordinarse á perfección e mantén a mesma garra que o curso pasado. Este mércores, as xogadoras esperan demostrar igual motivación e ganas de medrar ante os seus. 

 Será a primeira festa do balonmán da tempada na Sangriña, que xa puido goza de dous avances do que viña co Trofeo Festas do Monte e o Memorial Juan Rodríguez na pretempada. Aínda que ao anfitrión guardés custáballe aínda encaixar tódalas pezas ata atopar o seu sitio naquel momento (caeu 19-21 ante o São Pedro do Sul e 19-23 ante o Bera Bera tras dous encontros con varias dificultades), a afección do Inferno sabe que o nivel subiu e a mentalidade ligueira está xa instaurada na mente do plantel. Equipo no que, de novo, volverán brillar todos os seus membros sobre a pista, sen ter que lamentar ningunha ausencia por lesións ou baixas. 

 Polo demais, será a ocasión para medir forzas ante un Granollers igualmente renovado. O conxunto catalán, que un ano máis dirixe Robert Cuesta, viviu moitos cambios dende o final da tempada 2024/2025, entre os que destacan a saída de oito xogadoras: Ester Somaza, Alba Tort, Júlia Nuez, Lea Kofler, Paula Milagros, Giulia Guareiro, Kadiatou Jallow e Ariana Portillo, quen viste agora a camisola guardesa. Compensouno con cinco incorporacións: Nayla de Andrés, Mireia Torras, Raquel Moré, Judith Vizuete e a ex do Guardés, Itziar Martínez. Moitas delas teñen xa pasado no equipo vallesán, polo que o traballo de pretempada contou con certos precedentes que facilitaron o engraxamento dos novos engrenaxes. E aínda que o novo cadro de persoal pisou forte e amosouse con opcións na primeira xornada, as de Cuesta topáronse de fronte cun Rocasa Gran Canaria máis decidido que finalmente levou o encontro a domicilio (29-32).  

 Por todo iso, o obxectivo granollerí para este mércores será sumar os seus primeiros dous puntos da tempada e realizar toda unha declaración de intencións ante O Inferno. Pola súa parte, o Guardés sabe que contará cun máis sobre a pista, coa emoción engadida de supoñer o pistoletazo de saída a unha tempada ilusionante.  

Ana Seabra: “Queremos estar concentradas e centradas en ser cada día máis equipo. Aproveitaremos o factor casa” 

 Ana Seabra, a técnica do Guardés, valora ao Granollers coma un equipo que “malia ter feito uns cambios, ten moita calidade”. “Afrontaremos este partido con moito respecto e coa ilusión de seguir medrando”, explica a preparadora. 

 A adestradora prevé que o seu rival veña “cun obxectivo claro de ter boas sensacións e sumar puntos”, pero anuncia que ela e as súas “queremos continuar co traballo que estivemos facendo e corrixir as dinámicas que cremos que nos fallaron no primeiro partido”, onde a vitoria estivo a piques de quedar en Lanzarote. “Queremos estar concentradas e centradas en ser cada día máis equipo”, conclúe Seabra sobre este inicio de tempada. 

 Por último, a técnica espera que sexa unha grande festa do balonmán para a afección da Guarda, e que permita ás xogadoras “aproveitar o factor casa, que sempre é unha vantaxe”.  

AXENDA 

Liga Guerreras Iberdrola | Xornada 2 

Mecalia Atlético Guardés – KH-7 BM Granollers  

Mércores, 3 de setembro | 21.00 horas | Pavillón da Sangriña  

Retransmisión pola canle de YouTube, do  Club Balonmán Atlético Guardés.