TOMIÑO

A Agrupación Musical de Goián ofrecerá a súa “Noite de Copla” no Seixo, con Pilar Boyero  

• A formación, recentemente galardoada co Premio Martín Códax á mellor banda popular, actuará o venres 22 de agosto ás 22:00 horas na praza tomiñesa  

Infogauda / Tomiño 

 Este venres, Tomiño acollerá un concerto especial da Agrupación Musical de Goián, titulado “Noite de Copla”, dentro do programa cultural #Son&Serán. A banda promete unha velada emocionante na que se mesturarán as armonías do norte coas melodías do sur, ofrecendo un repertorio pensado para emocionar a todos os públicos. 

 O espectáculo, baixo a dirección de Pedro Villarroel González, presenta un formato innovador no que se poderán escoitar clásicos do folclore como “Un rojo clavel”, “Como una ola”, “Como yo te amo” ou “Me gustas mucho”, popularizados polas voces de Rocío Jurado e Rocío Dúrcal. Para poñer voz a estes temas, contarán coa presenza da recoñecida cantante extremeña Pilar Boyero, especialista en copla e galardoada con múltiples premios internacionais, quen engadirá un brillo especial ao concerto. 

 Esta proposta inédita encádrase na consolidada traxectoria da Agrupación Musical de Goián, fundada en 1994. Desde entón, a banda combina a formación de novos músicos coa preservación da tradición bandística galega, contando cunha escola que forma máis de 160 alumnos/as, un coro infantil e bandas xuvenil e infantil, o que lle permite manter vivo o seu repertorio á vez que impulsa novas xeracións de músicos. 

 A historia recente da banda tamén está marcada por recoñecementos e colaboracións destacadas. O ano pasado recibiron o Premio Martín Códax da Música á mellor banda popular polo concerto Chavellos Sinfónico, resultado dunha colaboración co grupo tradicional Os Chavellos de Pereiras. Ao longo dos anos, tamén traballaron con artistas como Ana Lains, Pelepau, Serafín Zubiri, Abraham Cupeiro, Silvia Ferré, Angelina Álvarez e Davinia Álvarez, ademais de participar en programas da TVG e proxectos innovadores con formacións como Odaiko Percusión. 

 O concerto do 22 de agosto promete ser unha das citas máis especiais do verán en Tomiño, ofrecendo ao público unha noite de música ao aire libre, chea de emoción, talento local e copla de alta calidade, consolidando á Agrupación Musical de Goián como un referente da música galega contemporánea.