GALIZA

A CIG-Servizos convoca concentracións simultáneas 

• En demanda de convenios colectivos dignos para as traballadoras das residencias privadas de maiores e dos Servizos de Axuda no Fogar

Estas mobilizacións dan continuidade á campaña que a CIG está a desenvolver dende hai meses pola dignificación e o recoñecemento dos traballos de coidados 

Foto: CIG

Infogauda / Galiza

 A CIG-Servizos ten convocadas para o vindeiro luns, 14 de xullo, concentracións simultáneas nas catro provincias en demanda de convenios colectivos dignos para as traballadoras das residencias privadas de maiores e dos Servizos de Axuda no Fogar. 

 As protestas realizaranse ás 11:30 horas nos seguintes lugares:  

• A Coruña, diante do Espazo Amizar (Rúa Gregorio Hernández, 2-4). 

• Vigo, diante do edificio da Xunta de Galiza (Praza da Estrela). 

• Lugo, diante do edificio multiusos da Xunta (Ronda da Muralla, 70). 

• Ourense, diante do edificio administrativo da Xunta.  

 Estas mobilizacións dan continuidade á campaña que a CIG está a desenvolver dende hai meses pola dignificación e o recoñecemento dos traballos de coidados e para reclamar a intervención da Consellaría de Política Social, como administración responsábel do sector en Galiza, de estabelecer as ratios e de realizar o labor inspector; mais tamén como responsábel da política de privatización dos coidados que está na base desta precariedade laboral e no deterioro da atención que se presta ás persoas usuarias. 

 O sector dos coidados, maioritariamente composto por mulleres, é a columna vertebral do apoio á poboación envellecida de Galiza, pero segue sendo cronicamente infravalorado e as condicións laborais son de auténtica miseria.