DEPORTES

BALONMÁN FEMININO

O Mecalia Atlético Guardés prepárase para a tempada 2025/2026 

• O equipo de División de Honra Feminina comezou este luns 28 de xullo os adestramentos 

• Ana Cristina Teixeira Seabra puido contar coa grande maioría de xogadoras nesta primeira toma de contacto 

• O cadro de persoal, no que hai sete novas incorporacións, poderá reunir sensacións durante unha ocupada pretempada antes do comezo da Liga o vindeiro 30 de agosto en Lanzarote 

O Mecalia Atlético Guardés iniciou a pretempada cunha sesión de adestramento única este luns pola tarde, xa que as derradeiras xogadoras en chegar á vila guardesa fixérono ao longo da mañá

Foto: M.A.G.

Redacción Deportes / A Guarda 

 O Mecalia Atlético Guardés inaugura a pretempada 2025/2026. Este luns 28 de xullo pola tarde, o equipo de División de Honra Feminina deuse cita no pavillón da Sangriña para unha primeira sesión de adestramento conxunta e toma de contacto dun cadro de persoal no que destacan sete novas incorporacións. Nas vindeiras semanas, o equipo miñoto vivirá unha pretempada chea de citas amigables que servirán como quentamento ata o comezo da Liga Guerreras Iberdrola o próximo 30 de agosto.  

 O Mecalia Atlético Guardés iniciou a pretempada cunha sesión de adestramento única este luns pola tarde, xa que as derradeiras xogadoras en chegar á vila guardesa fixérono ao longo da mañá. Asistiu á cita a grande maioría do cadro de persoal, a excepción da última fichaxe anunciada, Amandine Balzinc, que non puido viaxar aínda por motivos burocráticos, se ben espérase que se incorpore á rutina do equipo nos vindeiros días. Polo demais, estiveron presentes as xogadoras habituais: Cristina Cifuentes, María Sancha, Ania Ramos, María Palomo, Blazka Hauptman, Jazmín Mendoza, Cecilia Cacheda, Carme Castro, Elena Martínez e Estela Carrera.  

 O resto da semana, o Mecalia Atlético Guardés retomará o seu ritmo habitual, con sesións matinais de ximnasio e adestramentos de maior duración polas tardes, ademais dos recoñecementos médicos obrigatorios do comezo de tempada, que terán lugar este mércores 30 pola mañá.  

 Ademais da ausencia da gardameta francesa, un dos detalles máis destacables foi a volta de Elena Martínez, totalmente recuperada da rotura de ligamento cruzado que a apartou das pistas a comezos da pasada tempada. Pero o máis notable, sen dúbida, é o carácter renovado do cadro de persoal deste Mecalia Atlético Guardés, que ademais de Balzinc suma outras novas incorporacións que si estiveron presentes este luns: a tamén porteira Sabina Mínguez, Anouk Nieuwenweg, Lorena Téllez, Ariana Portillo, Nerea Gil e Rosane Serrano. Unha serie de movementos que revelaron unha forte aposta do Club pola proxección de futuro nas súas filas, con varias xogadoras mozas e estranxeiras, que se estrearán na elite española; xunto cun exercicio de confianza noutras deportistas máis veteranas e con experiencia noutros equipos rivais. 

 O conxunto terá numerosas oportunidades para aclimatarse e buscar sensacións ao longo da pretempada, que durará seis semanas e enlazará co comezo da Liga. O Mecalia Atlético Guardés prevé un total de cinco citas, comezando por un torneo no Porriño, o 8 e 9 de agosto; continuando con dous encontros amigables que recibirán a equipos portugueses na Sangriña a fin de semana seguinte; e rematando o mes de agosto co Torneo Summer Bag en Villacelama o 22 e 23. 

 Polo demais, o equipo miñoto disputará sete días despois a primeira xornada da Liga Guerreras Iberdrola 2025/2026, na que lle tocará visitar ao Zonzamas Plus Car Lanzarote, o sábado, 30 de agosto, ás 20.00 horas. A pretempada finalizará definitivamente a fin de semana posterior coa final da Supercopa de Galicia o 7 de setembro, co habitual derbi ante o Balonmán Porriño cuxos detalles aínda están por fixar.