A moza Laura Santos, autora do cartel da Festa do Peixe Espada, recibiu, polo seu deseño, o premio do concurso infantil
• A popular celebración guardesa, que se prolongará toda a fin de semana, empezou esta tarde cun recordo aos tripulantes do Argos Georgia.
Mar Bermúdez / A Guarda
Nun emotivo acto celebrado no salón de plenos do Concello de A Guarda, a moza Laura Santos Adrover, alumna de 6º de Primaria do Colexio San José Carmelitas, recibiu o premio do Concurso Infantil de Deseño do Cartel da Festa do Peixe Espada polo seu orixinal debuxo.
A cerimonia comezou ás 19:00 horas coa intervención de Joaquín Cadilla Castro, presidente de Orpagu, quen deu paso ao alcalde de A Guarda, Roberto José Álvarez Carrero. Durante a súa intervención, Cadilla tivo un recordo emocionado para os tripulantes do Argos Georgia, o barco que naufragou o mércores nas Malvinas. “O noso corazón está coas familias dos falecidos e dos desaparecidos”, sinalou Cadilla, engadindo que “os actos festivos manteranse para non ocasionar ningún prexuízo ás empresas colaboradoras do evento, pero no corazón de toda a familia mariñeira da Guarda están as familias afectadas por esta traxedia.”
“O mar bríndanos sustento e oportunidades, pero tamén pode ser cruel e desapiadado. Hoxe, máis que nunca, debemos lembrar a súa dualidade e apoiar ás nosas comunidades mariñeiras nestes momentos difíciles”, dixo Joaquín Cadilla.
O alcalde, Roberto José Álvarez Carrero, entregou o premio a Laura Santos Adrover en recoñecemento á súa creatividade. A continuación, o presidente e a directora xerente de Orpagu fixeron entrega de diplomas conmemorativos a todos os participantes do concurso, destacando a importancia de fomentar a arte e a cultura entre os máis novos, así como o coñecemento da tradición mariñeira local.
A cerimonia concluíu cunha foto de familia que reuniu a todos os participantes e asistentes, marcando o arranque oficial dunha das festas máis populares da zona.
Ningún comentario:
Publicar un comentario