TUI

Tui celebrará o Día de Rosalía con diversas propostas para lembrar a nosa poeta máis universal

• Lonas con poemas de Rosalía de Castro, o Caldo de Gloria en varios restaurantes e unha curtametraxe para os escolares, forma parte do programa

Lonas con poemas de Rosalía de Castro na fachada da Biblioteca Municipal de Tui

Foto: C.T.

Infogauda / Tui

 A concellería de Cultura do Concello de Tui promove arredor deste venres, 23 de febreiro, á conmemoración do “Día de Rosalía”, en que se celebrará o 187 aniversario do nacemento da escritora máis representativa e reivindicativa de Galicia pola súa defensa do pobo e da lingua. O seu libro Cantares Gallegos sinala o inicio da restauración do uso escrito da nosa lingua e o final dos Séculos Escuros, de silencio e esquecemento. A súa obra é un retrato do pobo galego e goza dunha total actualidade.  

 O Concello de Tui adoptou un acordo plenario no ano 2013 para a celebración anual deste evento e neste ano dende a concellería de Cultura, a través da Biblioteca Municipal, téñense preparado diversas lonas con varios dos poemas máis populares de Rosalía de Castro que se colocarán na fachada da súa sede así como na Praza da Inmaculada para lembrar esta celebración e contribuír á difusión da súa obra poética.  

 Este xoves, 22 de febreiro, o Teatro Municipal acollerá a proxección da curtametraxe “A rosa incandescente”, presentada pola súa guionista e produtora Anxos G. Fonte. Tal e como explica a propia guionista, o filme quere achegarnos unha Rosalía de Castro cercana e directa que nos conta ela mesma algúns dos aspectos fundamentais da súa obra: a paixón pola literatura oral, o compromiso co seu país, a sensibilidade cos marxinados da sociedade, a análise económica e social do seu tempo e, por suposto, as dificultades que tivo que enfrontar por ser muller e escritora. Rosalía é a mesma rosa incandescente de intelixencia, sensibilidade e paixón polo que fai. Nesta proxección participará o alumnado de Secundaria dos centros educativos tudenses. 

 Sonsoles Vicente Solla, concelleira de Ensino, Cultura e Mocidade, sinala que, como en anos anteriores, o Concello de Tui promove a iniciativa, impulsada dende a Fundación Rosalía de Castro, denominada "Caldo de Gloria". Unha proposta que xorde a partir do poema “Miña casiña, meu lar” (Follas novas, 1880), no que unha muller pobre que chega á casa mollada e esfameada, a pesar de que carece de todo, consegue o milagre da supervivencia: facer un humilde caldo de gloria e un bolo do pote, quentarse ó pé do lume e ser feliz. “Queremos que Galicia, sinalan dende a Fundación Rosalía de Castro, lembre a Rosalía no seu día compartindo en lugares públicos ou no ambiente familiar este “Caldo de Gloria” dos humildes, un caldo para celebrar tamén a nosa cultura gastronómica popular”. No concello de Tui súmanse a esta iniciativa de ofrecer este “Caldo de Gloria” arredor do vindeiro venres 23 de febreiro, diversos establecementos de restauración, en concreto: Restaurante El Molino, Restaurante O novo Cabalo Furado, Ideas Peregrinas, O Trisco do Miño, Santiamén, cocina divina, e Restaurante Cruceiro do Monte, que ofrecerán este produto aos seus clientes.  

DÍA DE ROSALÍA 

  • Colocación de pancartas con versos de Rosalía na praza da Inmaculada e na fachada do edificio “Francisco Sánchez”.

  • “Caldo de gloria” nos restaurantes de Tui Restaurante El Molino, Restaurante O Novo Cabalo Furado, O Trisco do Miño, Ideas Peregrinas, Santiamén-cocina divina e Cruceiro do Monte. 

22 de febreiro, xoves 

  • Proxección da curta “A rosa incandescente”, presentada pola súa guionista Anxos G. Fonte para o alumnado tudense. 

Teatro Municipal – 12.00 horas. 

23 de febreiro, venres 

  • “Día de Rosalía”. Entrega poemas de agasallo na Biblioteca Municipal.