“NADAL CAMPOSINO: UN NADAL DE CONTO”
• Camposancos inaguraráo o domingo 10 de decembro, ás 19 horas, co acendido das luces
Mª Mercedes Martínez Vázquez* / Camposancos
Camposancos engalánase novamente cunhas excelentes decoracións de nadal, cubrindo de fantasía todos os espazos nun proceso de creación colectiva. Os veciños e veciñas decoran as súas casas e os espazos públicos con materiais naturais ou de refugallo. A temática deste ano xira en torno aos contos infantís tradicionais.
Dende a Entidade Local Menor de Camposancos (ELM) agradecemos a implicación da veciñanza que permite levar adiante esta importante actividade. Trátase dun nadal ecolóxico, de proximidade, biodegradable, reciclado e coas mínimas emisións de CO2, con perspectiva de xénero, en galego e cun enfoque claramente tradicional. Nel participan todos os barrios na medida das súas posibilidades, nun proceso colaborativo, que axuda a construír comunidade e gozar do traballo colectivo, pensado para ensinar a rapazada outras maneiras de enfrontar a nova realidade e cuidar o planeta, mediante o xogo e a diversión.
A inauguración será o domingo 10 de decembro, ás 19 horas, co acendido das luces.
O día 17, ás 17 horas, na Sociedade Os Amigos (Casino de Camposancos) proxectarase o filme Goián Vaciado, do Grupo San Roquiño,
O sábado 23 ás 17 horas contaremos coa actuación de Bieito Solo, e o venres 29 de decembro ás 17 horas haberá un pasacalles animado polas gaiteiras “Do lusco ao fusco” con saída da Praza de San Amaro e remate no barrio do Palomar. Contarase coa presenza do Apalpador e da Apalpadora, personaxes tradicionais da cultura galega, carboeiros de cabelo vermello que viven no monte e que cada ano polo Nadal baixan saudar e xogar cos máis pequenos da casa repartindo comida e xerando fantasía e ilusión.
* Presidenta da E.L.M. de Camposancos.
Ningún comentario:
Publicar un comentario