TUI

O mércores 26 de xullo abrirase o prazo de inscrición para as asociacións que desexen participar na Festa Gastronómica 

O evento celebrarse o sábado 19 de agosto

Sobremesas nunha edición precedente da Festa Gastronómica

Foto: C.T.

Infogauda / Tui

 O próximo mércores 26 de xullo, o Concello de Tui abrirá o prazo de inscrición para participar na Festa Gastronómica que se vai celebrar o sábado, 19 de agosto, dentro da programación da XI Festa do Miño.  

 As asociacións tudenses inscritas no Rexistro de Asociacións do Concello de Tui que desexen participar deberán presentar o modelo de solicitude xunto coa documentación requirida o mércores 26, xoves 27 e venres 28 de xullo a través da sede electrónica do concello de Tui.  

 Segundo se recolle nas bases desta convocatoria, que se poden consultar tanto na web municipal, na sede electrónica e no taboleiro de anuncios da casa do concello, participarán as quince primeiras asociacións que presenten a solicitude e cumpran os requisitos establecidos.  

 A Festa Gastronómica celebrarase o sábado, 19 de agosto, de 20:00 a 24:00 horas, no tramo da rúa Compostela comprendido entre a rúa Ourense e a rúa Betanzos.  Cada asociación contará con dous postos de venda de produtos naturais, autóctonos e  artesáns, e as persoas que realicen á venda dos mesmos, deberán estar en posesión do Carné de Manipulador de Alimentos, e levar un vestiario axeitado.  

 A concelleira de Cultura, Ensino e Mocidade, Sonsoles Vicente, convida ás asociacións tudenses a participar neste evento que ten contado con gran éxito en anos anteriores. Destaca a concelleira coma a Festa Gastronómica ten xa un oco propio no calendario festivo do verán en Tui. Agradece amais aos distintos colectivos a súa participación e involucración tanto neste evento coma nas diferentes actividades que se levan a cabo ao longo do ano.