DEPORTES

 BALONMAN

Abel González deixa de ser adestrador do Mecalia Atlético Guardés

• O club agradece ao técnico asturiano a súa profesionalidade e o seu esforzo durante estes meses 

• É o primeiro cesamento dun técnico nas dez tempadas e media que a entidade leva en División de Honra 

• A ata o de agora segunda adestradora, Ana Seabra, toma as rendas do equipo apoiada polo preparador físico Joâo Mesquita 

Abel González

Foto: M.A.G.

Infogauda / Redacción

 O que onte era un rumor, no día de hoxe xa é unha realidade. A directiva do Mecalia Atlético Guardés decidiu que Abel González deixe de ser o adestrador do primeiro equipo. A entidade agradece ao técnico asturiano a súa intachable profesionalidade, a súa bonhomía e amabilidade, así como a súa intensa dedicación e as toneladas de esforzo que lle meteu ao seu labor nestes meses á fronte do grupo.  

 Lamentablemente, os resultados non acompañaron ao traballo e a xunta directiva tomou esta dura decisión, que tamén é inédita. E é que, nos dez anos e medio que o Mecalia Atlético Guardés acumula na División de Honra, esta é a primeira destitución dun adestrador do primeiro equipo que leva a cabo.  

 Desta forma, Abel conclúe así unha segunda etapa nun club do que foi partícipe directo dos éxitos. Como segundo adestrador de José Ignacio Prades foi campión de Liga en 2017 e subcampión de Copa o ano pasado. Como primeiro tivo que lidar coa enorme dificultade de non contar coa Sangriña ata decembro e ter que xogar oito dos once partidos da primeira volta a domicilio. 

 A directiva decidiu que Ana Seabra tome as rendas do grupo. A adestradora portuguesa, ata o momento segunda de Abel, pasa á fronte apoiada por Joâo Mesquita, preparador físico do equipo. Debutará no partido de ida dos cuartos de final da Copa Europea na cidade portuguesa de Funchal, fronte ao Madeira Andebol, club no que militou sete anos na súa época como xogadora.