A GUARDA

BALONMÁN

DHF

A liga volve á Sangriña oito meses despois 

• O Mecalia Atlético Guardés recibe ao Elxe na estrea ligueira de O Inferno (sábado, 19:00) 

• O equipo do Baixo Miño busca rexurdir en Liga, empezando polo primeiro dos oito partidos en casa que disputará nesta segunda volta 

• O colectivo ilicitano atravesa un momento doce, con sete vitorias consecutivas 

• Estefanía Descalzo e Nazaret Calzado poderán reestrearse se o técnico considérao oportuno

 

Abel González dirixíndose as xogadoras do Mecalia Atlético Guardés nos momentos previos a un encontro no pavillón da Sangriña

Foto: M.A.G.

Infogauda / Redacción

 A esperanza renace cando volves a casa. É a frase á que se agarra o Mecalia Atlético Guardés para remontar o voo na segunda volta da liga Guerreiras Iberdrola. O equipo miñoto ten dez partidos por diante e oito deles serán ao lume do Inferno. Na Sangriña. A fortaleza guardesa non acolle un partido ligueiro desde o pasado 25 de maio. É dicir, pasaron máis de oito meses desde a última vez. Por iso, hai ganas de revivir sensacións no reformado recinto e para iso vivirase un duelo de tinguiduras europeas fronte ao AtticGo Elxe (sábado, 19:00).  

 Tanto é así que se o equipo ilicitano supera a súa eliminatoria contra Xixón, veríase co Mecalia Atlético Guardés en semifinais da Copa Europea. A condición de que, está claro, que as pupilas de Abel González eliminen ao Madeira portugués. Pero para iso aínda queda tempo. O deporte só permite ir semana a semana e o que incumbe agora mesmo á tripulación miñota é volver competir como local en Liga e, sobre todo, facelo na Sangriña. O último partido con puntos en xogo en O Inferno rexistrou un 32-32 entre o Mecalia Atlético Guardés e o Rocasa Gran Canaria. Un punto que deixou practicamente selada a décima clasificación consecutiva para competicións europeas da entidade. A partir de aí, comezou a reforma do pavillón, que concluíu cunha eliminatoria europea ante o VZV neerlandés a modo de inauguración en decembro e outra máis fronte ao H71 das Illas Feroe en xaneiro. Ambas, superadas con éxito.  

 A volta da liga á Sangriña non só pecha un lapso de oito meses. Tamén conclúe outro de case catro desde a última vez que o colectivo que dirixe Abel González empregouse como local. Sucedeu o pasado 8 de outubro, ante o Beti-Onak, en Tui (29-19). Foi o último dos tres partidos -saldados con tres vitorias- que o Mecalia Atlético Guardés xogou no recinto tudense. Desde entón, grazas a acordos con Bera Bera e Zuazo para intercambiar a orde das sedes, o Mecalia Atlético Guardés non volveu a exercer como anfitrión. Por ese motivo, xogará en casa oito dos dez partidos que restan.  

 O primeiro, o deste sábado contra o Elxe, será de alta esixencia. O equipo ilicitano acumula sete vitorias consecutivas. Catro en Liga, dúas en Copa Europea e un máis para eliminar ao Porriño e clasificarse para a fase final da Copa da Raíña, na que tamén estará o conxunto guardés. Trátase dun colectivo potente e ben compensado, con xogadoras de nivel en todos os postos: Nicole Morais, Ivet Musons, Danila So Delgado, Celia Guilabert e un longo etcétera. No partido da primeira volta saíu vitorioso ante o Mecalia Atlético Guardés (24-21) nun duelo cunha calor asfixiante no Esperanza Lag, de Elxe.  

 Meses despois, o equipo de Abel tratará de darlle a volta á situación. Para iso conta con dous novos reforzos: Nazaret Calzado e Estefanía Descalzo. Ambas as dúas entran na convocatoria e poderán gozar de minutos no caso de que así o decida o técnico asturiano. A extremo de Bolaños ten máis opcións por acumular máis rodaxe competitiva. Con todo, a valenciana tamén podería vivir un novo debut na Sangriña. Non estarán, en cambio, as lesionadas Júlia Nuez e Ángela Nieto.  

AXENDA 

Liga Guerreiras Iberdrola 

Xornada 13 

Mecalia Atlético Guardés - AtticGo Elxe 

Sábado, 4 de febreiro 

19:00 

A Sangriña (A Guarda)

Árbitros: Albert Pérez e Daniel Toro. 

En directo pola canle de YouTube do Club Balonmán Atlético Guardés.